સભિકસૌગતશાસનપ્રવ્રજ્યાવ્રતચરણપરિવર્ત · શ્લોક 101-120

તદ્ અત્ર સમયં કૃત્વા વિવાદં કર્તુમ્ ઉત્સહે ।
તદ્ ભવન્તો ઽપિ મધ્યસ્થા દ્રષ્ટુમ્ અર્હન્તુ સાધવઃ

યદ્ય્ એષાત્ર વિવાદે માં પરાજેતું હિ શક્નુયાત્ ।
અસ્યાઃ શિષ્યત્વમ્ આસાદ્ય ભવેયાહં સદાનુગઃ

યદ્ય્ અત્રાહમ્ ઇમાં જિત્વા જયશ્રિયં સમાપ્નુયાં ।
મમ શિષ્યત્વમ્ આસાદ્ય ભવેદ્ એષા સદાનુગા

ઇતિ સંપ્રાર્થ્ય વિપ્રો ઽસૌ તાં પરિવ્રાજિકાં સતીં ।
પશ્યન્ વ્યાકરણપૃશ્નં પૃષ્ટ્વા સમભ્યચોદયત્

તત્પ્રત્યુત્તરમ્ ઉદ્દિશ્ય સા પરિવ્રાજિકા સુધીઃ ।
બ્રાહ્મણં તં વિનિર્જિત્ય વ્યસ્માયયન્ સભાજનાન્

તચ્ છ્રુત્વા તે જનાઃ સર્વે વિસ્મયાપન્નમાનસાઃ ।
પ્રાજ્ઞેયં યતિર્ ઇત્ય્ ઉક્ત્વા સ્વસ્વાલયમ્ ઉપાચરમ્

તત્ પરેદ્યુસ્ તથા તત્ર સા પરિવ્રાજિકાગતા ।
તે ઽપિ સન્તો જનાઃ સર્વે સમાગત્ય સમાશ્રયન્

તતઃ સ બ્રાહ્મણસ્ તત્ર સભામધ્યે સમાશ્રિતઃ ।
તાં પરિવ્રાજિકાં પશ્યઞ્ ચ્છાસ્ત્રાર્થં પર્યપૃચ્છત

તચ્ છાસ્ત્રાર્થં સમાખ્યાય યુવતિર્ અપિ સા સુધીઃ ।
વિદ્વાંસમ્ અપિ તં જિત્વા સર્વાન્ સતો ઽન્વમોદયત્

એવં ચ તૃતીયે ઽપ્ય્ અહ્નિ સા યોષિદ્ અપિ સન્મતિઃ ।
સર્વકલાભિસંવાદે વિસ્પષ્ટાર્થમ્ ઉદાહરત્

એવં તુર્યદિને ચાપિ પઞ્ચમે દિવસે તથા ।
ષષ્ઠે ઽપિ વાસરે સૈવં યથાર્થં સમુપાદિશત્

એવં સ બ્રાહ્મણસ્ તત્ર સપ્તમે ઽહ્નિ સમાશ્રિતે ।
ક્રિયાબન્ધં તય કૃત્વા રંગભૂમિમ્ ઉપાસરત્

ત્રપાકુલચિત્ત ઇવ જનાન્ આહ સુચાતુરઃ ।
અદ્યાપ્ય્ અહં યદિ જિતસ્ તસ્યાઃ સ્યામ્ અનુગો નનુ

જેષ્યતિ પ્રત્યહં સૈવમ્ એકસ્મિન્ન્ અપ્ય્ અહં કિમુ ।
વાણીચ્છલાજ્ જિતા સા તુ યતો યોષિત્ સરસ્વતી

ઇતિ પ્રોક્ત્વા દ્વિજઃ કામી કામાતુરીં મહાધિયં ।
પ્રગલ્ભવચસા નારિં વેદાન્તં સમપૃચ્છત

તત્ર વિજ્ઞાપિ સા સાધ્વી સ્મૃત્વાભિસમયં સુધીઃ ।
અપિ પ્રત્યુત્તરં કિઞ્ચિદ્ અસમર્થૈવ નો દદૌ

તતઃ સ બ્રાહ્મણઃ પશ્યન્ મહાજનાન્ સભાશ્રિતાન્ ।
સાનન્દસુપ્રસન્નાસ્યઃ સાઞ્જલિર્ એવમ્ અબ્રવીત્

ભવન્તો દૃશ્યતામ્ અત્ર લભતે કો જયશ્રિયં ।
ઇતિ સમીક્ષ્ય પ્રાખ્યાતુમ્ અર્હન્તિ માન્યથા ખલુ

ઇતિ તત્ પ્રાર્થિતં શ્રુત્વા સર્વે ઽપિ તે સભાજનાઃ ।
વિદ્યાનિધિં મહાપ્રાજ્ઞં સંપ્રશંસ્યૈવમ્ અબ્રુવન્

કોવિદાત્ર ભવાઞ્ જેતા યતિર્ એષા પરાજિતા ।
તદ્ ઇયં ભવતઃ શિષ્યા ભવેત સર્વદાનુગા