ઋગ્વેદ · અધ્યાય 9.068

પ્ર દેવમ્ અચ્છા મધુમન્ત ઇન્દવો ઽસિષ્યદન્ત ગાવ આ ન ધેનવઃ ।
બર્હિષદો વચનાવન્ત ઊધભિઃ પરિસ્રુતમ્ ઉસ્રિયા નિર્ણિજં ધિરે ॥

સ રોરુવદ્ અભિ પૂર્વા અચિક્રદદ્ ઉપારુહઃ શ્રથયન્ સ્વાદતે હરિઃ ।
તિરઃ પવિત્રમ્ પરિયન્ન્ ઉરુ જ્રયો નિ શર્યાણિ દધતે દેવ આ વરમ્ ॥

વિ યો મમે યમ્યા સંયતી મદઃ સાકંવૃધા પયસા પિન્વદ્ અક્ષિતા ।
મહી અપારે રજસી વિવેવિદદ્ અભિવ્રજન્ન્ અક્ષિતમ્ પાજ આ દદે ॥

સ માતરા વિચરન્ વાજયન્ન્ અપઃ પ્ર મેધિરઃ સ્વધયા પિન્વતે પદમ્ ।
અંશુર્ યવેન પિપિશે યતો નૃભિઃ સં જામિભિર્ નસતે રક્ષતે શિરઃ ॥

સં દક્ષેણ મનસા જાયતે કવિર્ ઋતસ્ય ગર્ભો નિહિતો યમા પરઃ ।
યૂના હ સન્તા પ્રથમં વિ જજ્ઞતુર્ ગુહા હિતં જનિમ નેમમ્ ઉદ્યતમ્ ॥

મન્દ્રસ્ય રૂપં વિવિદુર્ મનીષિણઃ શ્યેનો યદ્ અન્ધો અભરત્ પરાવતઃ ।
તમ્ મર્જયન્ત સુવૃધં નદીષ્વ્ આઁ ઉશન્તમ્ અંશુમ્ પરિયન્તમ્ ઋગ્મિયમ્ ॥

ત્વામ્ મૃજન્તિ દશ યોષણઃ સુતં સોમ ઋષિભિર્ મતિભિર્ ધીતિભિર્ હિતમ્ ।
અવ્યો વારેભિર્ ઉત દેવહૂતિભિર્ નૃભિર્ યતો વાજમ્ આ દર્ષિ સાતયે ॥

પરિપ્રયન્તં વય્યં સુષંસદં સોમમ્ મનીષા અભ્ય્ અનૂષત સ્તુભઃ ।
યો ધારયા મધુમાઁ ઊર્મિણા દિવ ઇયર્તિ વાચં રયિષાળ્ અમર્ત્યઃ ॥

અયં દિવ ઇયર્તિ વિશ્વમ્ આ રજઃ સોમઃ પુનાનઃ કલશેષુ સીદતિ ।
અદ્ભિર્ ગોભિર્ મૃજ્યતે અદ્રિભિઃ સુતઃ પુનાન ઇન્દુર્ વરિવો વિદત્ પ્રિયમ્ ॥

એવા નઃ સોમ પરિષિચ્યમાનો વયો દધચ્ ચિત્રતમમ્ પવસ્વ ।
અદ્વેષે દ્યાવાપૃથિવી હુવેમ દેવા ધત્ત રયિમ્ અસ્મે સુવીરમ્ ॥