ઋગ્વેદ · અધ્યાય 8.095

આ ત્વા ગિરો રથીર્ ઇવાસ્થુઃ સુતેષુ ગિર્વણઃ ।
અભિ ત્વા સમ્ અનૂષતેન્દ્ર વત્સં ન માતરઃ ॥

આ ત્વા શુક્રા અચુચ્યવુઃ સુતાસ ઇન્દ્ર ગિર્વણઃ ।
પિબા ત્વ્ અ1સ્યાન્ધસ ઇન્દ્ર વિશ્વાસુ તે હિતમ્ ॥

પિબા સોમમ્ મદાય કમ્ ઇન્દ્ર શ્યેનાભૃતં સુતમ્ ।
ત્વં હિ શશ્વતીનામ્ પતી રાજા વિશામ્ અસિ ॥

શ્રુધી હવં તિરશ્ચ્યા ઇન્દ્ર યસ્ ત્વા સપર્યતિ ।
સુવીર્યસ્ય ગોમતો રાયસ્ પૂર્ધિ મહાઁ અસિ ॥

ઇન્દ્ર યસ્ તે નવીયસીં ગિરમ્ મન્દ્રામ્ અજીજનત્ ।
ચિકિત્વિન્મનસં ધિયમ્ પ્રત્નામ્ ઋતસ્ય પિપ્યુષીમ્ ॥

તમ્ ઉ ષ્ટવામ યં ગિર ઇન્દ્રમ્ ઉક્થાનિ વાવૃધુઃ ।
પુરૂણ્ય્ અસ્ય પૌંસ્યા સિષાસન્તો વનામહે ॥

એતો ન્વ્ ઇન્દ્રં સ્તવામ શુદ્ધં શુદ્ધેન સામ્ના ।
શુદ્ધૈર્ ઉક્થૈર્ વાવૃધ્વાંસં શુદ્ધ આશીર્વાન્ મમત્તુ ॥

ઇન્દ્ર શુદ્ધો ન આ ગહિ શુદ્ધઃ શુદ્ધાભિર્ ઊતિભિઃ ।
શુદ્ધો રયિં નિ ધારય શુદ્ધો મમદ્ધિ સોમ્યઃ ॥

ઇન્દ્ર શુદ્ધો હિ નો રયિં શુદ્ધો રત્નાનિ દાશુષે ।
શુદ્ધો વૃત્રાણિ જિઘ્નસે શુદ્ધો વાજં સિષાસસિ ॥