ઋગ્વેદ · અધ્યાય 8.096

અસ્મા ઉષાસ આતિરન્ત યામમ્ ઇન્દ્રાય નક્તમ્ ઊર્મ્યાઃ સુવાચઃ ।
અસ્મા આપો માતરઃ સપ્ત તસ્થુર્ નૃભ્યસ્ તરાય સિન્ધવઃ સુપારાઃ ॥

અતિવિદ્ધા વિથુરેણા ચિદ્ અસ્ત્રા ત્રિઃ સપ્ત સાનુ સંહિતા ગિરીણામ્ ।
ન તદ્ દેવો ન મર્ત્યસ્ તુતુર્યાદ્ યાનિ પ્રવૃદ્ધો વૃષભશ્ ચકાર ॥

ઇન્દ્રસ્ય વજ્ર આયસો નિમિશ્લ ઇન્દ્રસ્ય બાહ્વોર્ ભૂયિષ્ઠમ્ ઓજઃ ।
શીર્ષન્ન્ ઇન્દ્રસ્ય ક્રતવો નિરેક આસન્ન્ એષન્ત શ્રુત્યા ઉપાકે ॥

મન્યે ત્વા યજ્ઞિયં યજ્ઞિયાનામ્ મન્યે ત્વા ચ્યવનમ્ અચ્યુતાનામ્ ।
મન્યે ત્વા સત્વનામ્ ઇન્દ્ર કેતુમ્ મન્યે ત્વા વૃષભં ચર્ષણીનામ્ ॥

આ યદ્ વજ્રમ્ બાહ્વોર્ ઇન્દ્ર ધત્સે મદચ્યુતમ્ અહયે હન્તવા ઉ ।
પ્ર પર્વતા અનવન્ત પ્ર ગાવઃ પ્ર બ્રહ્માણો અભિનક્ષન્ત ઇન્દ્રમ્ ॥

તમ્ ઉ ષ્ટવામ ય ઇમા જજાન વિશ્વા જાતાન્ય્ અવરાણ્ય્ અસ્માત્ ।
ઇન્દ્રેણ મિત્રં દિધિષેમ ગીર્ભિર્ ઉપો નમોભિર્ વૃષભં વિશેમ ॥

વૃત્રસ્ય ત્વા શ્વસથાદ્ ઈષમાણા વિશ્વે દેવા અજહુર્ યે સખાયઃ ।
મરુદ્ભિર્ ઇન્દ્ર સખ્યં તે અસ્ત્વ્ અથેમા વિશ્વાઃ પૃતના જયાસિ ॥

ત્રિઃ ષષ્ટિસ્ ત્વા મરુતો વાવૃધાના ઉસ્રા ઇવ રાશયો યજ્ઞિયાસઃ ।
ઉપ ત્વેમઃ કૃધિ નો ભાગધેયં શુષ્મં ત એના હવિષા વિધેમ ॥

તિગ્મમ્ આયુધમ્ મરુતામ્ અનીકં કસ્ ત ઇન્દ્ર પ્રતિ વજ્રં દધર્ષ ।
અનાયુધાસો અસુરા અદેવાશ્ ચક્રેણ તાઁ અપ વપ ઋજીષિન્ ॥

મહ ઉગ્રાય તવસે સુવૃક્તિમ્ પ્રેરય શિવતમાય પશ્વઃ ।
ગિર્વાહસે ગિર ઇન્દ્રાય પૂર્વીર્ ધેહિ તન્વે કુવિદ્ અઙ્ગ વેદત્ ॥

ઉક્થવાહસે વિભ્વે મનીષાં દ્રુણા ન પારમ્ ઈરયા નદીનામ્ ।
નિ સ્પૃશ ધિયા તન્વિ શ્રુતસ્ય જુષ્ટતરસ્ય કુવિદ્ અઙ્ગ વેદત્ ॥

તદ્ વિવિડ્ઢિ યત્ ત ઇન્દ્રો જુજોષત્ સ્તુહિ સુષ્ટુતિં નમસા વિવાસ ।
ઉપ ભૂષ જરિતર્ મા રુવણ્યઃ શ્રાવયા વાચં કુવિદ્ અઙ્ગ વેદત્ ॥

અવ દ્રપ્સો અંશુમતીમ્ અતિષ્ઠદ્ ઇયાનઃ કૃષ્ણો દશભિઃ સહસ્રૈઃ ।
આવત્ તમ્ ઇન્દ્રઃ શચ્યા ધમન્તમ્ અપ સ્નેહિતીર્ નૃમણા અધત્ત ॥

દ્રપ્સમ્ અપશ્યં વિષુણે ચરન્તમ્ ઉપહ્વરે નદ્યો અંશુમત્યાઃ ।
નભો ન કૃષ્ણમ્ અવતસ્થિવાંસમ્ ઇષ્યામિ વો વૃષણો યુધ્યતાજૌ ॥

અધ દ્રપ્સો અંશુમત્યા ઉપસ્થે ઽધારયત્ તન્વં તિત્વિષાણઃ ।
વિશો અદેવીર્ અભ્ય્ આ3ચરન્તીર્ બૃહસ્પતિના યુજેન્દ્રઃ સસાહે ॥

ત્વં હ ત્યત્ સપ્તભ્યો જાયમાનો ઽશત્રુભ્યો અભવઃ શત્રુર્ ઇન્દ્ર ।
ગૂળ્હે દ્યાવાપૃથિવી અન્વ્ અવિન્દો વિભુમદ્ભ્યો ભુવનેભ્યો રણં ધાઃ ॥

ત્વં હ ત્યદ્ અપ્રતિમાનમ્ ઓજો વજ્રેણ વજ્રિન્ ધૃષિતો જઘન્થ ।
ત્વં શુષ્ણસ્યાવાતિરો વધત્રૈસ્ ત્વં ગા ઇન્દ્ર શચ્યેદ્ અવિન્દઃ ॥

ત્વં હ ત્યદ્ વૃષભ ચર્ષણીનાં ઘનો વૃત્રાણાં તવિષો બભૂથ ।
ત્વં સિન્ધૂઁર્ અસૃજસ્ તસ્તભાનાન્ ત્વમ્ અપો અજયો દાસપત્નીઃ ॥

સ સુક્રતૂ રણિતા યઃ સુતેષ્વ્ અનુત્તમન્યુર્ યો અહેવ રેવાન્ ।
ય એક ઇન્ નર્ય્ અપાંસિ કર્તા સ વૃત્રહા પ્રતીદ્ અન્યમ્ આહુઃ ॥

સ વૃત્રહેન્દ્રશ્ ચર્ષણીધૃત્ તં સુષ્ટુત્યા હવ્યં હુવેમ ।
સ પ્રાવિતા મઘવા નો ઽધિવક્તા સ વાજસ્ય શ્રવસ્યસ્ય દાતા ॥

સ વૃત્રહેન્દ્ર ઋભુક્ષાઃ સદ્યો જજ્ઞાનો હવ્યો બભૂવ ।
કૃણ્વન્ન્ અપાંસિ નર્યા પુરૂણિ સોમો ન પીતો હવ્યઃ સખિભ્યઃ ॥