ઋગ્વેદ · અધ્યાય 8.078

પુરોળાશં નો અન્ધસ ઇન્દ્ર સહસ્રમ્ આ ભર ।
શતા ચ શૂર ગોનામ્ ॥

આ નો ભર વ્યઞ્જનં ગામ્ અશ્વમ્ અભ્યઞ્જનમ્ ।
સચા મના હિરણ્યયા ॥

ઉત નઃ કર્ણશોભના પુરૂણિ ધૃષ્ણવ્ આ ભર ।
ત્વં હિ શૃણ્વિષે વસો ॥

નકીં વૃધીક ઇન્દ્ર તે ન સુષા ન સુદા ઉત ।
નાન્યસ્ ત્વચ્ છૂર વાઘતઃ ॥

નકીમ્ ઇન્દ્રો નિકર્તવે ન શક્રઃ પરિશક્તવે ।
વિશ્વં શૃણોતિ પશ્યતિ ॥

સ મન્યુમ્ મર્ત્યાનામ્ અદબ્ધો નિ ચિકીષતે ।
પુરા નિદશ્ ચિકીષતે ॥

ક્રત્વ ઇત્ પૂર્ણમ્ ઉદરં તુરસ્યાસ્તિ વિધતઃ ।
વૃત્રઘ્નઃ સોમપાવ્નઃ ॥

ત્વે વસૂનિ સંગતા વિશ્વા ચ સોમ સૌભગા ।
સુદાત્વ્ અપરિહ્વૃતા ॥

ત્વામ્ ઇદ્ યવયુર્ મમ કામો ગવ્યુર્ હિરણ્યયુઃ ।
ત્વામ્ અશ્વયુર્ એષતે ॥

તવેદ્ ઇન્દ્રાહમ્ આશસા હસ્તે દાત્રં ચના દદે ।
દિનસ્ય વા મઘવન્ સમ્ભૃતસ્ય વા પૂર્ધિ યવસ્ય કાશિના ॥