ઋગ્વેદ · અધ્યાય 8.076

ઇમં નુ માયિનં હુવ ઇન્દ્રમ્ ઈશાનમ્ ઓજસા ।
મરુત્વન્તં ન વૃઞ્જસે ॥

અયમ્ ઇન્દ્રો મરુત્સખા વિ વૃત્રસ્યાભિનચ્ છિરઃ ।
વજ્રેણ શતપર્વણા ॥

વાવૃધાનો મરુત્સખેન્દ્રો વિ વૃત્રમ્ ઐરયત્ ।
સૃજન્ સમુદ્રિયા અપઃ ॥

અયં હ યેન વા ઇદં સ્વર્ મરુત્વતા જિતમ્ ।
ઇન્દ્રેણ સોમપીતયે ॥

મરુત્વન્તમ્ ઋજીષિણમ્ ઓજસ્વન્તં વિરપ્શિનમ્ ।
ઇન્દ્રં ગીર્ભિર્ હવામહે ॥

ઇન્દ્રમ્ પ્રત્નેન મન્મના મરુત્વન્તં હવામહે ।
અસ્ય સોમસ્ય પીતયે ॥

મરુત્વાઁ ઇન્દ્ર મીઢ્વઃ પિબા સોમં શતક્રતો ।
અસ્મિન્ યજ્ઞે પુરુષ્ટુત ॥

તુભ્યેદ્ ઇન્દ્ર મરુત્વતે સુતાઃ સોમાસો અદ્રિવઃ ।
હૃદા હૂયન્ત ઉક્થિનઃ ॥

પિબેદ્ ઇન્દ્ર મરુત્સખા સુતં સોમં દિવિષ્ટિષુ ।
વજ્રં શિશાન ઓજસા ॥

ઉત્તિષ્ઠન્ન્ ઓજસા સહ પીત્વી શિપ્રે અવેપયઃ ।
સોમમ્ ઇન્દ્ર ચમૂ સુતમ્ ॥

અનુ ત્વા રોદસી ઉભે ક્રક્ષમાણમ્ અકૃપેતામ્ ।
ઇન્દ્ર યદ્ દસ્યુહાભવઃ ॥

વાચમ્ અષ્ટાપદીમ્ અહં નવસ્રક્તિમ્ ઋતસ્પૃશમ્ ।
ઇન્દ્રાત્ પરિ તન્વમ્ મમે ॥