ઋગ્વેદ · અધ્યાય 8.074

વિશો-વિશો વો અતિથિં વાજયન્તઃ પુરુપ્રિયમ્ ।
અગ્નિં વો દુર્યં વચઃ સ્તુષે શૂષસ્ય મન્મભિઃ ॥

યં જનાસો હવિષ્મન્તો મિત્રં ન સર્પિરાસુતિમ્ ।
પ્રશંસન્તિ પ્રશસ્તિભિઃ ॥

પન્યાંસં જાતવેદસં યો દેવતાત્ય્ ઉદ્યતા ।
હવ્યાન્ય્ ઐરયદ્ દિવિ ॥

આગન્મ વૃત્રહન્તમં જ્યેષ્ઠમ્ અગ્નિમ્ આનવમ્ ।
યસ્ય શ્રુતર્વા બૃહન્ન્ આર્ક્ષો અનીક એધતે ॥

અમૃતં જાતવેદસં તિરસ્ તમાંસિ દર્શતમ્ ।
ઘૃતાહવનમ્ ઈડ્યમ્ ॥

સબાધો યં જના ઇમે3 ઽગ્નિં હવ્યેભિર્ ઈળતે ।
જુહ્વાનાસો યતસ્રુચઃ ॥

ઇયં તે નવ્યસી મતિર્ અગ્ને અધાય્ય્ અસ્મદ્ આ ।
મન્દ્ર સુજાત સુક્રતો ઽમૂર દસ્માતિથે ॥

સા તે અગ્ને શંતમા ચનિષ્ઠા ભવતુ પ્રિયા ।
તયા વર્ધસ્વ સુષ્ટુતઃ ॥

સા દ્યુમ્નૈર્ દ્યુમ્નિની બૃહદ્ ઉપોપ શ્રવસિ શ્રવઃ ।
દધીત વૃત્રતૂર્યે ॥

અશ્વમ્ ઇદ્ ગાં રથપ્રાં ત્વેષમ્ ઇન્દ્રં ન સત્પતિમ્ ।
યસ્ય શ્રવાંસિ તૂર્વથ પન્યમ્-પન્યં ચ કૃષ્ટયઃ ॥

યં ત્વા ગોપવનો ગિરા ચનિષ્ઠદ્ અગ્ને અઙ્ગિરઃ ।
સ પાવક શ્રુધી હવમ્ ॥

યં ત્વા જનાસ ઈળતે સબાધો વાજસાતયે ।
સ બોધિ વૃત્રતૂર્યે ॥

અહં હુવાન આર્ક્ષે શ્રુતર્વણિ મદચ્યુતિ ।
શર્ધાંસીવ સ્તુકાવિનામ્ મૃક્ષા શીર્ષા ચતુર્ણામ્ ॥

માં ચત્વાર આશવઃ શવિષ્ઠસ્ય દ્રવિત્નવઃ ।
સુરથાસો અભિ પ્રયો વક્ષન્ વયો ન તુગ્ર્યમ્ ॥

સત્યમ્ ઇત્ ત્વા મહેનદિ પરુષ્ણ્ય્ અવ દેદિશમ્ ।
નેમ્ આપો અશ્વદાતરઃ શવિષ્ઠાદ્ અસ્તિ મર્ત્યઃ ॥