ઋગ્વેદ · અધ્યાય 8.060

અગ્ન આ યાહ્ય્ અગ્નિભિર્ હોતારં ત્વા વૃણીમહે ।
આ ત્વામ્ અનક્તુ પ્રયતા હવિષ્મતી યજિષ્ઠમ્ બર્હિર્ આસદે ॥

અચ્છા હિ ત્વા સહસઃ સૂનો અઙ્ગિરઃ સ્રુચશ્ ચરન્ત્ય્ અધ્વરે ।
ઊર્જો નપાતં ઘૃતકેશમ્ ઈમહે ઽગ્નિં યજ્ઞેષુ પૂર્વ્યમ્ ॥

અગ્ને કવિર્ વેધા અસિ હોતા પાવક યક્ષ્યઃ ।
મન્દ્રો યજિષ્ઠો અધ્વરેષ્વ્ ઈડ્યો વિપ્રેભિઃ શુક્ર મન્મભિઃ ॥

અદ્રોઘમ્ આ વહોશતો યવિષ્ઠ્ય દેવાઁ અજસ્ર વીતયે ।
અભિ પ્રયાંસિ સુધિતા વસો ગહિ મન્દસ્વ ધીતિભિર્ હિતઃ ॥

ત્વમ્ ઇત્ સપ્રથા અસ્ય્ અગ્ને ત્રાતર્ ઋતસ્ કવિઃ ।
ત્વાં વિપ્રાસઃ સમિધાન દીદિવ આ વિવાસન્તિ વેધસઃ ॥

શોચા શોચિષ્ઠ દીદિહિ વિશે મયો રાસ્વ સ્તોત્રે મહાઁ અસિ ।
દેવાનાં શર્મન્ મમ સન્તુ સૂરયઃ શત્રૂષાહઃ સ્વગ્નયઃ ॥

યથા ચિદ્ વૃદ્ધમ્ અતસમ્ અગ્ને સંજૂર્વસિ ક્ષમિ ।
એવા દહ મિત્રમહો યો અસ્મધ્રુગ્ દુર્મન્મા કશ્ ચ વેનતિ ॥

મા નો મર્તાય રિપવે રક્ષસ્વિને માઘશંસાય રીરધઃ ।
અસ્રેધદ્ભિસ્ તરણિભિર્ યવિષ્ઠ્ય શિવેભિઃ પાહિ પાયુભિઃ ॥

પાહિ નો અગ્ન એકયા પાહ્ય્ ઉ1ત દ્વિતીયયા ।
પાહિ ગીર્ભિસ્ તિસૃભિર્ ઊર્જામ્ પતે પાહિ ચતસૃભિર્ વસો ॥

પાહિ વિશ્વસ્માદ્ રક્ષસો અરાવ્ણઃ પ્ર સ્મ વાજેષુ નો ઽવ ।
ત્વામ્ ઇદ્ ધિ નેદિષ્ઠં દેવતાતય આપિં નક્ષામહે વૃધે ॥

આ નો અગ્ને વયોવૃધં રયિમ્ પાવક શંસ્યમ્ ।
રાસ્વા ચ ન ઉપમાતે પુરુસ્પૃહં સુનીતી સ્વયશસ્તરમ્ ॥

યેન વંસામ પૃતનાસુ શર્ધતસ્ તરન્તો અર્ય આદિશઃ ।
સ ત્વં નો વર્ધ પ્રયસા શચીવસો જિન્વા ધિયો વસુવિદઃ ॥

શિશાનો વૃષભો યથાગ્નિઃ શૃઙ્ગે દવિધ્વત્ ।
તિગ્મા અસ્ય હનવો ન પ્રતિધૃષે સુજમ્ભઃ સહસો યહુઃ ॥

નહિ તે અગ્ને વૃષભ પ્રતિધૃષે જમ્ભાસો યદ્ વિતિષ્ઠસે ।
સ ત્વં નો હોતઃ સુહુતં હવિષ્ કૃધિ વંસ્વા નો વાર્યા પુરુ ॥

શેષે વનેષુ માત્રોઃ સં ત્વા મર્તાસ ઇન્ધતે ।
અતન્દ્રો હવ્યા વહસિ હવિષ્કૃત આદ્ ઇદ્ દેવેષુ રાજસિ ॥

સપ્ત હોતારસ્ તમ્ ઇદ્ ઈળતે ત્વાગ્ને સુત્યજમ્ અહ્રયમ્ ।
ભિનત્સ્ય્ અદ્રિં તપસા વિ શોચિષા પ્રાગ્ને તિષ્ઠ જનાઁ અતિ ॥

અગ્નિમ્-અગ્નિં વો અધ્રિગું હુવેમ વૃક્તબર્હિષઃ ।
અગ્નિં હિતપ્રયસઃ શશ્વતીષ્વ્ આ હોતારં ચર્ષણીનામ્ ॥

કેતેન શર્મન્ સચતે સુષામણ્ય્ અગ્ને તુભ્યં ચિકિત્વના ।
ઇષણ્યયા નઃ પુરુરૂપમ્ આ ભર વાજં નેદિષ્ઠમ્ ઊતયે ॥

અગ્ને જરિતર્ વિશ્પતિસ્ તેપાનો દેવ રક્ષસઃ ।
અપ્રોષિવાન્ ગૃહપતિર્ મહાઁ અસિ દિવસ્ પાયુર્ દુરોણયુઃ ॥

મા નો રક્ષ આ વેશીદ્ આઘૃણીવસો મા યાતુર્ યાતુમાવતામ્ ।
પરોગવ્યૂત્ય્ અનિરામ્ અપ ક્ષુધમ્ અગ્ને સેધ રક્ષસ્વિનઃ ॥