ઋગ્વેદ · અધ્યાય 8.046

ત્વાવતઃ પુરૂવસો વયમ્ ઇન્દ્ર પ્રણેતઃ ।
સ્મસિ સ્થાતર્ હરીણામ્ ॥

ત્વાં હિ સત્યમ્ અદ્રિવો વિદ્મ દાતારમ્ ઇષામ્ ।
વિદ્મ દાતારં રયીણામ્ ॥

આ યસ્ય તે મહિમાનં શતમૂતે શતક્રતો ।
ગીર્ભિર્ ગૃણન્તિ કારવઃ ॥

સુનીથો ઘા સ મર્ત્યો યમ્ મરુતો યમ્ અર્યમા ।
મિત્રઃ પાન્ત્ય્ અદ્રુહઃ ॥

દધાનો ગોમદ્ અશ્વવત્ સુવીર્યમ્ આદિત્યજૂત એધતે ।
સદા રાયા પુરુસ્પૃહા ॥

તમ્ ઇન્દ્રં દાનમ્ ઈમહે શવસાનમ્ અભીર્વમ્ ।
ઈશાનં રાય ઈમહે ॥

તસ્મિન્ હિ સન્ત્ય્ ઊતયો વિશ્વા અભીરવઃ સચા ।
તમ્ આ વહન્તુ સપ્તયઃ પુરૂવસુમ્ મદાય હરયઃ સુતમ્ ॥

યસ્ તે મદો વરેણ્યો ય ઇન્દ્ર વૃત્રહન્તમઃ ।
ય આદદિઃ સ્વ1ર્ નૃભિર્ યઃ પૃતનાસુ દુષ્ટરઃ ॥

યો દુષ્ટરો વિશ્વવાર શ્રવાય્યો વાજેષ્વ્ અસ્તિ તરુતા ।
સ નઃ શવિષ્ઠ સવના વસો ગહિ ગમેમ ગોમતિ વ્રજે ॥

ગવ્યો ષુ ણો યથા પુરાશ્વયોત રથયા ।
વરિવસ્ય મહામહ ॥

નહિ તે શૂર રાધસો ઽન્તં વિન્દામિ સત્રા ।
દશસ્યા નો મઘવન્ નૂ ચિદ્ અદ્રિવો ધિયો વાજેભિર્ આવિથ ॥

ય ઋષ્વઃ શ્રાવયત્સખા વિશ્વેત્ સ વેદ જનિમા પુરુષ્ટુતઃ ।
તં વિશ્વે માનુષા યુગેન્દ્રં હવન્તે તવિષં યતસ્રુચઃ ॥

સ નો વાજેષ્વ્ અવિતા પુરૂવસુઃ પુરઃસ્થાતા મઘવા વૃત્રહા ભુવત્ ॥

અભિ વો વીરમ્ અન્ધસો મદેષુ ગાય ગિરા મહા વિચેતસમ્ ।
ઇન્દ્રં નામ શ્રુત્યં શાકિનં વચો યથા ॥

દદી રેક્ણસ્ તન્વે દદિર્ વસુ દદિર્ વાજેષુ પુરુહૂત વાજિનમ્ ।
નૂનમ્ અથ ॥

વિશ્વેષામ્ ઇરજ્યન્તં વસૂનાં સાસહ્વાંસં ચિદ્ અસ્ય વર્પસઃ ।
કૃપયતો નૂનમ્ અત્ય્ અથ ॥

મહઃ સુ વો અરમ્ ઇષે સ્તવામહે મીળ્હુષે અરંગમાય જગ્મયે ।
યજ્ઞેભિર્ ગીર્ભિર્ વિશ્વમનુષામ્ મરુતામ્ ઇયક્ષસિ ગાયે ત્વા નમસા ગિરા ॥

યે પાતયન્તે અજ્મભિર્ ગિરીણાં સ્નુભિર્ એષામ્ ।
યજ્ઞમ્ મહિષ્વણીનાં સુમ્નં તુવિષ્વણીનામ્ પ્રાધ્વરે ॥

પ્રભઙ્ગં દુર્મતીનામ્ ઇન્દ્ર શવિષ્ઠા ભર ।
રયિમ્ અસ્મભ્યં યુજ્યં ચોદયન્મતે જ્યેષ્ઠં ચોદયન્મતે ॥

સનિતઃ સુસનિતર્ ઉગ્ર ચિત્ર ચેતિષ્ઠ સૂનૃત ।
પ્રાસહા સમ્રાટ્ સહુરિં સહન્તમ્ ભુજ્યું વાજેષુ પૂર્વ્યમ્ ॥

આ સ એતુ ય ઈવદ્ આઁ અદેવઃ પૂર્તમ્ આદદે ।
યથા ચિદ્ વશો અશ્વ્યઃ પૃથુશ્રવસિ કાનીતે3 ઽસ્યા વ્યુષ્ય્ આદદે ॥

ષષ્ટિં સહસ્રાશ્વ્યસ્યાયુતાસનમ્ ઉષ્ટ્રાનાં વિંશતિં શતા ।
દશ શ્યાવીનાં શતા દશ ત્ર્યરુષીણાં દશ ગવાં સહસ્રા ॥

દશ શ્યાવા ઋધદ્રયો વીતવારાસ આશવઃ ।
મથ્રા નેમિં નિ વાવૃતુઃ ॥

દાનાસઃ પૃથુશ્રવસઃ કાનીતસ્ય સુરાધસઃ ।
રથં હિરણ્યયં દદન્ મંહિષ્ઠઃ સૂરિર્ અભૂદ્ વર્ષિષ્ઠમ્ અકૃત શ્રવઃ ॥

આ નો વાયો મહે તને યાહિ મખાય પાજસે ।
વયં હિ તે ચકૃમા ભૂરિ દાવને સદ્યશ્ ચિન્ મહિ દાવને ॥

યો અશ્વેભિર્ વહતે વસ્ત ઉસ્રાસ્ ત્રિઃ સપ્ત સપ્તતીનામ્ ।
એભિઃ સોમેભિઃ સોમસુદ્ભિઃ સોમપા દાનાય શુક્રપૂતપાઃ ॥

યો મ ઇમં ચિદ્ ઉ ત્મનામન્દચ્ ચિત્રં દાવને ।
અરટ્વે અક્ષે નહુષે સુકૃત્વનિ સુકૃત્તરાય સુક્રતુઃ ॥

ઉચથ્યે3 વપુષિ યઃ સ્વરાળ્ ઉત વાયો ઘૃતસ્નાઃ ।
અશ્વેષિતં રજેષિતં શુનેષિતમ્ પ્રાજ્મ તદ્ ઇદં નુ તત્ ॥

અધ પ્રિયમ્ ઇષિરાય ષષ્ટિં સહસ્રાસનમ્ ।
અશ્વાનામ્ ઇન્ ન વૃષ્ણામ્ ॥

ગાવો ન યૂથમ્ ઉપ યન્તિ વધ્રય ઉપ મા યન્તિ વધ્રયઃ ॥

અધ યચ્ ચારથે ગણે શતમ્ ઉષ્ટ્રાઁ અચિક્રદત્ ।
અધ શ્વિત્નેષુ વિંશતિં શતા ॥

શતં દાસે બલ્બૂથે વિપ્રસ્ તરુક્ષ આ દદે ।
તે તે વાયવ્ ઇમે જના મદન્તીન્દ્રગોપા મદન્તિ દેવગોપાઃ ॥

અધ સ્યા યોષણા મહી પ્રતીચી વશમ્ અશ્વ્યમ્ ।
અધિરુક્મા વિ નીયતે ॥