ઋગ્વેદ · અધ્યાય 8.042

અસ્તભ્નાદ્ દ્યામ્ અસુરો વિશ્વવેદા અમિમીત વરિમાણમ્ પૃથિવ્યાઃ ।
આસીદદ્ વિશ્વા ભુવનાનિ સમ્રાડ્ વિશ્વેત્ તાનિ વરુણસ્ય વ્રતાનિ ॥

એવા વન્દસ્વ વરુણમ્ બૃહન્તં નમસ્યા ધીરમ્ અમૃતસ્ય ગોપામ્ ।
સ નઃ શર્મ ત્રિવરૂથં વિ યંસત્ પાતં નો દ્યાવાપૃથિવી ઉપસ્થે ॥

ઇમાં ધિયં શિક્ષમાણસ્ય દેવ ક્રતું દક્ષં વરુણ સં શિશાધિ ।
યયાતિ વિશ્વા દુરિતા તરેમ સુતર્માણમ્ અધિ નાવં રુહેમ ॥

આ વાં ગ્રાવાણો અશ્વિના ધીભિર્ વિપ્રા અચુચ્યવુઃ ।
નાસત્યા સોમપીતયે નભન્તામ્ અન્યકે સમે ॥

યથા વામ્ અત્રિર્ અશ્વિના ગીર્ભિર્ વિપ્રો અજોહવીત્ ।
નાસત્યા સોમપીતયે નભન્તામ્ અન્યકે સમે ॥

એવા વામ્ અહ્વ ઊતયે યથાહુવન્ત મેધિરાઃ ।
નાસત્યા સોમપીતયે નભન્તામ્ અન્યકે સમે ॥