ઋગ્વેદ · અધ્યાય 8.039

અગ્નિમ્ અસ્તોષ્ય્ ઋગ્મિયમ્ અગ્નિમ્ ઈળા યજધ્યૈ ।
અગ્નિર્ દેવાઁ અનક્તુ ન ઉભે હિ વિદથે કવિર્ અન્તશ્ ચરતિ દૂત્ય1ં નભન્તામ્ અન્યકે સમે ॥

ન્ય્ અગ્ને નવ્યસા વચસ્ તનૂષુ શંસમ્ એષામ્ ।
ન્ય્ અરાતી રરાવ્ણાં વિશ્વા અર્યો અરાતીર્ ઇતો યુચ્છન્ત્વ્ આમુરો નભન્તામ્ અન્યકે સમે ॥

અગ્ને મન્માનિ તુભ્યં કં ઘૃતં ન જુહ્વ આસનિ ।
સ દેવેષુ પ્ર ચિકિદ્ધિ ત્વં હ્ય્ અસિ પૂર્વ્યઃ શિવો દૂતો વિવસ્વતો નભન્તામ્ અન્યકે સમે ॥

તત્-તદ્ અગ્નિર્ વયો દધે યથા-યથા કૃપણ્યતિ ।
ઊર્જાહુતિર્ વસૂનાં શં ચ યોશ્ ચ મયો દધે વિશ્વસ્યૈ દેવહૂત્યૈ નભન્તામ્ અન્યકે સમે ॥

સ ચિકેત સહીયસાગ્નિશ્ ચિત્રેણ કર્મણા ।
સ હોતા શશ્વતીનાં દક્ષિણાભિર્ અભીવૃત ઇનોતિ ચ પ્રતીવ્ય1ં નભન્તામ્ અન્યકે સમે ॥

અગ્નિર્ જાતા દેવાનામ્ અગ્નિર્ વેદ મર્તાનામ્ અપીચ્યમ્ ।
અગ્નિઃ સ દ્રવિણોદા અગ્નિર્ દ્વારા વ્ય્ ઊર્ણુતે સ્વાહુતો નવીયસા નભન્તામ્ અન્યકે સમે ॥

અગ્નિર્ દેવેષુ સંવસુઃ સ વિક્ષુ યજ્ઞિયાસ્વ્ આ ।
સ મુદા કાવ્યા પુરુ વિશ્વમ્ ભૂમેવ પુષ્યતિ દેવો દેવેષુ યજ્ઞિયો નભન્તામ્ અન્યકે સમે ॥

યો અગ્નિઃ સપ્તમાનુષઃ શ્રિતો વિશ્વેષુ સિન્ધુષુ ।
તમ્ આગન્મ ત્રિપસ્ત્યમ્ મન્ધાતુર્ દસ્યુહન્તમમ્ અગ્નિં યજ્ઞેષુ પૂર્વ્યં નભન્તામ્ અન્યકે સમે ॥

અગ્નિસ્ ત્રીણિ ત્રિધાતૂન્ય્ આ ક્ષેતિ વિદથા કવિઃ ।
સ ત્રીઁર્ એકાદશાઁ ઇહ યક્ષચ્ ચ પિપ્રયચ્ ચ નો વિપ્રો દૂતઃ પરિષ્કૃતો નભન્તામ્ અન્યકે સમે ॥

ત્વં નો અગ્ન આયુષુ ત્વં દેવેષુ પૂર્વ્ય વસ્વ એક ઇરજ્યસિ ।
ત્વામ્ આપઃ પરિસ્રુતઃ પરિ યન્તિ સ્વસેતવો નભન્તામ્ અન્યકે સમે ॥