ઋગ્વેદ · અધ્યાય 8.018

ઇદં હ નૂનમ્ એષાં સુમ્નમ્ ભિક્ષેત મર્ત્યઃ ।
આદિત્યાનામ્ અપૂર્વ્યં સવીમનિ ॥

અનર્વાણો હ્ય્ એષામ્ પન્થા આદિત્યાનામ્ ।
અદબ્ધાઃ સન્તિ પાયવઃ સુગેવૃધઃ ॥

તત્ સુ નઃ સવિતા ભગો વરુણો મિત્રો અર્યમા ।
શર્મ યચ્છન્તુ સપ્રથો યદ્ ઈમહે ॥

દેવેભિર્ દેવ્ય્ અદિતે ઽરિષ્ટભર્મન્ન્ આ ગહિ ।
સ્મત્ સૂરિભિઃ પુરુપ્રિયે સુશર્મભિઃ ॥

તે હિ પુત્રાસો અદિતેર્ વિદુર્ દ્વેષાંસિ યોતવે ।
અંહોશ્ ચિદ્ ઉરુચક્રયો ઽનેહસઃ ॥

અદિતિર્ નો દિવા પશુમ્ અદિતિર્ નક્તમ્ અદ્વયાઃ ।
અદિતિઃ પાત્વ્ અંહસઃ સદાવૃધા ॥

ઉત સ્યા નો દિવા મતિર્ અદિતિર્ ઊત્યા ગમત્ ।
સા શંતાતિ મયસ્ કરદ્ અપ સ્રિધઃ ॥

ઉત ત્યા દૈવ્યા ભિષજા શં નઃ કરતો અશ્વિના ।
યુયુયાતામ્ ઇતો રપો અપ સ્રિધઃ ॥

શમ્ અગ્નિર્ અગ્નિભિઃ કરચ્ છં નસ્ તપતુ સૂર્યઃ ।
શં વાતો વાત્વ્ અરપા અપ સ્રિધઃ ॥

અપામીવામ્ અપ સ્રિધમ્ અપ સેધત દુર્મતિમ્ ।
આદિત્યાસો યુયોતના નો અંહસઃ ॥

યુયોતા શરુમ્ અસ્મદ્ આઁ આદિત્યાસ ઉતામતિમ્ ।
ઋધગ્ દ્વેષઃ કૃણુત વિશ્વવેદસઃ ॥

તત્ સુ નઃ શર્મ યચ્છતાદિત્યા યન્ મુમોચતિ ।
એનસ્વન્તં ચિદ્ એનસઃ સુદાનવઃ ॥

યો નઃ કશ્ ચિદ્ રિરિક્ષતિ રક્ષસ્ત્વેન મર્ત્યઃ ।
સ્વૈઃ ષ એવૈ રિરિષીષ્ટ યુર્ જનઃ ॥

સમ્ ઇત્ તમ્ અઘમ્ અશ્નવદ્ દુઃશંસમ્ મર્ત્યં રિપુમ્ ।
યો અસ્મત્રા દુર્હણાવાઁ ઉપ દ્વયુઃ ॥

પાકત્રા સ્થન દેવા હૃત્સુ જાનીથ મર્ત્યમ્ ।
ઉપ દ્વયું ચાદ્વયું ચ વસવઃ ॥

આ શર્મ પર્વતાનામ્ ઓતાપાં વૃણીમહે ।
દ્યાવાક્ષામારે અસ્મદ્ રપસ્ કૃતમ્ ॥

તે નો ભદ્રેણ શર્મણા યુષ્માકં નાવા વસવઃ ।
અતિ વિશ્વાનિ દુરિતા પિપર્તન ॥

તુચે તનાય તત્ સુ નો દ્રાઘીય આયુર્ જીવસે ।
આદિત્યાસઃ સુમહસઃ કૃણોતન ॥

યજ્ઞો હીળો વો અન્તર આદિત્યા અસ્તિ મૃળત ।
યુષ્મે ઇદ્ વો અપિ ષ્મસિ સજાત્યે ॥

બૃહદ્ વરૂથમ્ મરુતાં દેવં ત્રાતારમ્ અશ્વિના ।
મિત્રમ્ ઈમહે વરુણં સ્વસ્તયે ॥

અનેહો મિત્રાર્યમન્ નૃવદ્ વરુણ શંસ્યમ્ ।
ત્રિવરૂથમ્ મરુતો યન્ત નશ્ છર્દિઃ ॥

યે ચિદ્ ધિ મૃત્યુબન્ધવ આદિત્યા મનવઃ સ્મસિ ।
પ્ર સૂ ન આયુર્ જીવસે તિરેતન ॥