ઋગ્વેદ · અધ્યાય 8.016

પ્ર સમ્રાજં ચર્ષણીનામ્ ઇન્દ્રં સ્તોતા નવ્યં ગીર્ભિઃ ।
નરં નૃષાહમ્ મંહિષ્ઠમ્ ॥

યસ્મિન્ન્ ઉક્થાનિ રણ્યન્તિ વિશ્વાનિ ચ શ્રવસ્યા ।
અપામ્ અવો ન સમુદ્રે ॥

તં સુષ્ટુત્યા વિવાસે જ્યેષ્ઠરાજમ્ ભરે કૃત્નુમ્ ।
મહો વાજિનં સનિભ્યઃ ॥

યસ્યાનૂના ગભીરા મદા ઉરવસ્ તરુત્રાઃ ।
હર્ષુમન્તઃ શૂરસાતૌ ॥

તમ્ ઇદ્ ધનેષુ હિતેષ્વ્ અધિવાકાય હવન્તે ।
યેષામ્ ઇન્દ્રસ્ તે જયન્તિ ॥

તમ્ ઇચ્ ચ્યૌત્નૈર્ આર્યન્તિ તં કૃતેભિશ્ ચર્ષણયઃ ।
એષ ઇન્દ્રો વરિવસ્કૃત્ ॥

ઇન્દ્રો બ્રહ્મેન્દ્ર ઋષિર્ ઇન્દ્રઃ પુરૂ પુરુહૂતઃ ।
મહાન્ મહીભિઃ શચીભિઃ ॥

સ સ્તોમ્યઃ સ હવ્યઃ સત્યઃ સત્વા તુવિકૂર્મિઃ ।
એકશ્ ચિત્ સન્ન્ અભિભૂતિઃ ॥

તમ્ અર્કેભિસ્ તં સામભિસ્ તં ગાયત્રૈશ્ ચર્ષણયઃ ।
ઇન્દ્રં વર્ધન્તિ ક્ષિતયઃ ॥

પ્રણેતારં વસ્યો અચ્છા કર્તારં જ્યોતિઃ સમત્સુ ।
સાસહ્વાંસં યુધામિત્રાન્ ॥

સ નઃ પપ્રિઃ પારયાતિ સ્વસ્તિ નાવા પુરુહૂતઃ ।
ઇન્દ્રો વિશ્વા અતિ દ્વિષઃ ॥

સ ત્વં ન ઇન્દ્ર વાજેભિર્ દશસ્યા ચ ગાતુયા ચ ।
અચ્છા ચ નઃ સુમ્નં નેષિ ॥