ઋગ્વેદ · અધ્યાય 8.013

ઇન્દ્રઃ સુતેષુ સોમેષુ ક્રતુમ્ પુનીત ઉક્થ્યમ્ ।
વિદે વૃધસ્ય દક્ષસો મહાન્ હિ ષઃ ॥

સ પ્રથમે વ્યોમનિ દેવાનાં સદને વૃધઃ ।
સુપારઃ સુશ્રવસ્તમઃ સમ્ અપ્સુજિત્ ॥

તમ્ અહ્વે વાજસાતય ઇન્દ્રમ્ ભરાય શુષ્મિણમ્ ।
ભવા નઃ સુમ્ને અન્તમઃ સખા વૃધે ॥

ઇયં ત ઇન્દ્ર ગિર્વણો રાતિઃ ક્ષરતિ સુન્વતઃ ।
મન્દાનો અસ્ય બર્હિષો વિ રાજસિ ॥

નૂનં તદ્ ઇન્દ્ર દદ્ધિ નો યત્ ત્વા સુન્વન્ત ઈમહે ।
રયિં નશ્ ચિત્રમ્ આ ભરા સ્વર્વિદમ્ ॥

સ્તોતા યત્ તે વિચર્ષણિર્ અતિપ્રશર્ધયદ્ ગિરઃ ।
વયા ઇવાનુ રોહતે જુષન્ત યત્ ॥

પ્રત્નવજ્ જનયા ગિરઃ શૃણુધી જરિતુર્ હવમ્ ।
મદે-મદે વવક્ષિથા સુકૃત્વને ॥

ક્રીળન્ત્ય્ અસ્ય સૂનૃતા આપો ન પ્રવતા યતીઃ ।
અયા ધિયા ય ઉચ્યતે પતિર્ દિવઃ ॥

ઉતો પતિર્ ય ઉચ્યતે કૃષ્ટીનામ્ એક ઇદ્ વશી ।
નમોવૃધૈર્ અવસ્યુભિઃ સુતે રણ ॥

સ્તુહિ શ્રુતં વિપશ્ચિતં હરી યસ્ય પ્રસક્ષિણા ।
ગન્તારા દાશુષો ગૃહં નમસ્વિનઃ ॥

તૂતુજાનો મહેમતે ઽશ્વેભિઃ પ્રુષિતપ્સુભિઃ ।
આ યાહિ યજ્ઞમ્ આશુભિઃ શમ્ ઇદ્ ધિ તે ॥

ઇન્દ્ર શવિષ્ઠ સત્પતે રયિં ગૃણત્સુ ધારય ।
શ્રવઃ સૂરિભ્યો અમૃતં વસુત્વનમ્ ॥

હવે ત્વા સૂર ઉદિતે હવે મધ્યંદિને દિવઃ ।
જુષાણ ઇન્દ્ર સપ્તિભિર્ ન આ ગહિ ॥

આ તૂ ગહિ પ્ર તુ દ્રવ મત્સ્વા સુતસ્ય ગોમતઃ ।
તન્તું તનુષ્વ પૂર્વ્યં યથા વિદે ॥

યચ્ છક્રાસિ પરાવતિ યદ્ અર્વાવતિ વૃત્રહન્ ।
યદ્ વા સમુદ્રે અન્ધસો ઽવિતેદ્ અસિ ॥

ઇન્દ્રં વર્ધન્તુ નો ગિર ઇન્દ્રં સુતાસ ઇન્દવઃ ।
ઇન્દ્રે હવિષ્મતીર્ વિશો અરાણિષુઃ ॥

તમ્ ઇદ્ વિપ્રા અવસ્યવઃ પ્રવત્વતીભિર્ ઊતિભિઃ ।
ઇન્દ્રં ક્ષોણીર્ અવર્ધયન્ વયા ઇવ ॥

ત્રિકદ્રુકેષુ ચેતનં દેવાસો યજ્ઞમ્ અત્નત ।
તમ્ ઇદ્ વર્ધન્તુ નો ગિરઃ સદાવૃધમ્ ॥

સ્તોતા યત્ તે અનુવ્રત ઉક્થાન્ય્ ઋતુથા દધે ।
શુચિઃ પાવક ઉચ્યતે સો અદ્ભુતઃ ॥

તદ્ ઇદ્ રુદ્રસ્ય ચેતતિ યહ્વમ્ પ્રત્નેષુ ધામસુ ।
મનો યત્રા વિ તદ્ દધુર્ વિચેતસઃ ॥

યદિ મે સખ્યમ્ આવર ઇમસ્ય પાહ્ય્ અન્ધસઃ ।
યેન વિશ્વા અતિ દ્વિષો અતારિમ ॥

કદા ત ઇન્દ્ર ગિર્વણઃ સ્તોતા ભવાતિ શંતમઃ ।
કદા નો ગવ્યે અશ્વ્યે વસૌ દધઃ ॥

ઉત તે સુષ્ટુતા હરી વૃષણા વહતો રથમ્ ।
અજુર્યસ્ય મદિન્તમં યમ્ ઈમહે ॥

તમ્ ઈમહે પુરુષ્ટુતં યહ્વમ્ પ્રત્નાભિર્ ઊતિભિઃ ।
નિ બર્હિષિ પ્રિયે સદદ્ અધ દ્વિતા ॥

વર્ધસ્વા સુ પુરુષ્ટુત ઋષિષ્ટુતાભિર્ ઊતિભિઃ ।
ધુક્ષસ્વ પિપ્યુષીમ્ ઇષમ્ અવા ચ નઃ ॥

ઇન્દ્ર ત્વમ્ અવિતેદ્ અસીત્થા સ્તુવતો અદ્રિવઃ ।
ઋતાદ્ ઇયર્મિ તે ધિયમ્ મનોયુજમ્ ॥

ઇહ ત્યા સધમાદ્યા યુજાનઃ સોમપીતયે ।
હરી ઇન્દ્ર પ્રતદ્વસૂ અભિ સ્વર ॥

અભિ સ્વરન્તુ યે તવ રુદ્રાસઃ સક્ષત શ્રિયમ્ ।
ઉતો મરુત્વતીર્ વિશો અભિ પ્રયઃ ॥

ઇમા અસ્ય પ્રતૂર્તયઃ પદં જુષન્ત યદ્ દિવિ ।
નાભા યજ્ઞસ્ય સં દધુર્ યથા વિદે ॥

અયં દીર્ઘાય ચક્ષસે પ્રાચિ પ્રયત્ય્ અધ્વરે ।
મિમીતે યજ્ઞમ્ આનુષગ્ વિચક્ષ્ય ॥

વૃષાયમ્ ઇન્દ્ર તે રથ ઉતો તે વૃષણા હરી ।
વૃષા ત્વં શતક્રતો વૃષા હવઃ ॥

વૃષા ગ્રાવા વૃષા મદો વૃષા સોમો અયં સુતઃ ।
વૃષા યજ્ઞો યમ્ ઇન્વસિ વૃષા હવઃ ॥

વૃષા ત્વા વૃષણં હુવે વજ્રિઞ્ ચિત્રાભિર્ ઊતિભિઃ ।
વાવન્થ હિ પ્રતિષ્ટુતિં વૃષા હવઃ ॥