ઋગ્વેદ · અધ્યાય 8.011

ત્વમ્ અગ્ને વ્રતપા અસિ દેવ આ મર્ત્યેષ્વ્ આ ।
ત્વં યજ્ઞેષ્વ્ ઈડ્યઃ ॥

ત્વમ્ અસિ પ્રશસ્યો વિદથેષુ સહન્ત્ય ।
અગ્ને રથીર્ અધ્વરાણામ્ ॥

સ ત્વમ્ અસ્મદ્ અપ દ્વિષો યુયોધિ જાતવેદઃ ।
અદેવીર્ અગ્ને અરાતીઃ ॥

અન્તિ ચિત્ સન્તમ્ અહ યજ્ઞમ્ મર્તસ્ય રિપોઃ ।
નોપ વેષિ જાતવેદઃ ॥

મર્તા અમર્ત્યસ્ય તે ભૂરિ નામ મનામહે ।
વિપ્રાસો જાતવેદસઃ ॥

વિપ્રં વિપ્રાસો ઽવસે દેવમ્ મર્તાસ ઊતયે ।
અગ્નિં ગીર્ભિર્ હવામહે ॥

આ તે વત્સો મનો યમત્ પરમાચ્ ચિત્ સધસ્થાત્ ।
અગ્ને ત્વાંકામયા ગિરા ॥

પુરુત્રા હિ સદૃઙ્ઙ્ અસિ વિશો વિશ્વા અનુ પ્રભુઃ ।
સમત્સુ ત્વા હવામહે ॥

સમત્સ્વ્ અગ્નિમ્ અવસે વાજયન્તો હવામહે ।
વાજેષુ ચિત્રરાધસમ્ ॥

પ્રત્નો હિ કમ્ ઈડ્યો અધ્વરેષુ સનાચ્ ચ હોતા નવ્યશ્ ચ સત્સિ ।
સ્વાં ચાગ્ને તન્વમ્ પિપ્રયસ્વાસ્મભ્યં ચ સૌભગમ્ આ યજસ્વ ॥