ઋગ્વેદ · અધ્યાય 8.003

પિબા સુતસ્ય રસિનો મત્સ્વા ન ઇન્દ્ર ગોમતઃ ।
આપિર્ નો બોધિ સધમાદ્યો વૃધે3 ઽસ્માઁ અવન્તુ તે ધિયઃ ॥

ભૂયામ તે સુમતૌ વાજિનો વયમ્ મા નઃ સ્તર્ અભિમાતયે ।
અસ્માઞ્ ચિત્રાભિર્ અવતાદ્ અભિષ્ટિભિર્ આ નઃ સુમ્નેષુ યામય ॥

ઇમા ઉ ત્વા પુરૂવસો ગિરો વર્ધન્તુ યા મમ ।
પાવકવર્ણાઃ શુચયો વિપશ્ચિતો ઽભિ સ્તોમૈર્ અનૂષત ॥

અયં સહસ્રમ્ ઋષિભિઃ સહસ્કૃતઃ સમુદ્ર ઇવ પપ્રથે ।
સત્યઃ સો અસ્ય મહિમા ગૃણે શવો યજ્ઞેષુ વિપ્રરાજ્યે ॥

ઇન્દ્રમ્ ઇદ્ દેવતાતય ઇન્દ્રમ્ પ્રયત્ય્ અધ્વરે ।
ઇન્દ્રં સમીકે વનિનો હવામહ ઇન્દ્રં ધનસ્ય સાતયે ॥

ઇન્દ્રો મહ્ના રોદસી પપ્રથચ્ છવ ઇન્દ્રઃ સૂર્યમ્ અરોચયત્ ।
ઇન્દ્રે હ વિશ્વા ભુવનાનિ યેમિર ઇન્દ્રે સુવાનાસ ઇન્દવઃ ॥

અભિ ત્વા પૂર્વપીતય ઇન્દ્ર સ્તોમેભિર્ આયવઃ ।
સમીચીનાસ ઋભવઃ સમ્ અસ્વરન્ રુદ્રા ગૃણન્ત પૂર્વ્યમ્ ॥

અસ્યેદ્ ઇન્દ્રો વાવૃધે વૃષ્ણ્યં શવો મદે સુતસ્ય વિષ્ણવિ ।
અદ્યા તમ્ અસ્ય મહિમાનમ્ આયવો ઽનુ ષ્ટુવન્તિ પૂર્વથા ॥

તત્ ત્વા યામિ સુવીર્યં તદ્ બ્રહ્મ પૂર્વચિત્તયે ।
યેના યતિભ્યો ભૃગવે ધને હિતે યેન પ્રસ્કણ્વમ્ આવિથ ॥

યેના સમુદ્રમ્ અસૃજો મહીર્ અપસ્ તદ્ ઇન્દ્ર વૃષ્ણિ તે શવઃ ।
સદ્યઃ સો અસ્ય મહિમા ન સંનશે યં ક્ષોણીર્ અનુચક્રદે ॥

શગ્ધી ન ઇન્દ્ર યત્ ત્વા રયિં યામિ સુવીર્યમ્ ।
શગ્ધિ વાજાય પ્રથમં સિષાસતે શગ્ધિ સ્તોમાય પૂર્વ્ય ॥

શગ્ધી નો અસ્ય યદ્ ધ પૌરમ્ આવિથ ધિય ઇન્દ્ર સિષાસતઃ ।
શગ્ધિ યથા રુશમં શ્યાવકં કૃપમ્ ઇન્દ્ર પ્રાવઃ સ્વર્ણરમ્ ॥

કન્ નવ્યો અતસીનાં તુરો ગૃણીત મર્ત્યઃ ।
નહી ન્વ્ અસ્ય મહિમાનમ્ ઇન્દ્રિયં સ્વર્ ગૃણન્ત આનશુઃ ॥

કદ્ ઉ સ્તુવન્ત ઋતયન્ત દેવત ઋષિઃ કો વિપ્ર ઓહતે ।
કદા હવમ્ મઘવન્ન્ ઇન્દ્ર સુન્વતઃ કદ્ ઉ સ્તુવત આ ગમઃ ॥

ઉદ્ ઉ ત્યે મધુમત્તમા ગિરઃ સ્તોમાસ ઈરતે ।
સત્રાજિતો ધનસા અક્ષિતોતયો વાજયન્તો રથા ઇવ ॥

કણ્વા ઇવ ભૃગવઃ સૂર્યા ઇવ વિશ્વમ્ ઇદ્ ધીતમ્ આનશુઃ ।
ઇન્દ્રં સ્તોમેભિર્ મહયન્ત આયવઃ પ્રિયમેધાસો અસ્વરન્ ॥

યુક્ષ્વા હિ વૃત્રહન્તમ હરી ઇન્દ્ર પરાવતઃ ।
અર્વાચીનો મઘવન્ સોમપીતય ઉગ્ર ઋષ્વેભિર્ આ ગહિ ॥

ઇમે હિ તે કારવો વાવશુર્ ધિયા વિપ્રાસો મેધસાતયે ।
સ ત્વં નો મઘવન્ન્ ઇન્દ્ર ગિર્વણો વેનો ન શૃણુધી હવમ્ ॥

નિર્ ઇન્દ્ર બૃહતીભ્યો વૃત્રં ધનુભ્યો અસ્ફુરઃ ।
નિર્ અર્બુદસ્ય મૃગયસ્ય માયિનો નિઃ પર્વતસ્ય ગા આજઃ ॥

નિર્ અગ્નયો રુરુચુર્ નિર્ ઉ સૂર્યો નિઃ સોમ ઇન્દ્રિયો રસઃ ।
નિર્ અન્તરિક્ષાદ્ અધમો મહામ્ અહિં કૃષે તદ્ ઇન્દ્ર પૌંસ્યમ્ ॥

યમ્ મે દુર્ ઇન્દ્રો મરુતઃ પાકસ્થામા કૌરયાણઃ ।
વિશ્વેષાં ત્મના શોભિષ્ઠમ્ ઉપેવ દિવિ ધાવમાનમ્ ॥

રોહિતમ્ મે પાકસ્થામા સુધુરં કક્ષ્યપ્રામ્ ।
અદાદ્ રાયો વિબોધનમ્ ॥

યસ્મા અન્યે દશ પ્રતિ ધુરં વહન્તિ વહ્નયઃ ।
અસ્તં વયો ન તુગ્ર્યમ્ ॥

આત્મા પિતુસ્ તનૂર્ વાસ ઓજોદા અભ્યઞ્જનમ્ ।
તુરીયમ્ ઇદ્ રોહિતસ્ય પાકસ્થામાનમ્ ભોજં દાતારમ્ અબ્રવમ્ ॥