ઋગ્વેદ · અધ્યાય 7.082

ઇન્દ્રાવરુણા યુવમ્ અધ્વરાય નો વિશે જનાય મહિ શર્મ યચ્છતમ્ ।
દીર્ઘપ્રયજ્યુમ્ અતિ યો વનુષ્યતિ વયં જયેમ પૃતનાસુ દૂઢ્યઃ ॥

સમ્રાળ્ અન્યઃ સ્વરાળ્ અન્ય ઉચ્યતે વામ્ મહાન્તાવ્ ઇન્દ્રાવરુણા મહાવસૂ ।
વિશ્વે દેવાસઃ પરમે વ્યોમનિ સં વામ્ ઓજો વૃષણા સમ્ બલં દધુઃ ॥

અન્વ્ અપાં ખાન્ય્ અતૃન્તમ્ ઓજસા સૂર્યમ્ ઐરયતં દિવિ પ્રભુમ્ ।
ઇન્દ્રાવરુણા મદે અસ્ય માયિનો ઽપિન્વતમ્ અપિતઃ પિન્વતં ધિયઃ ॥

યુવામ્ ઇદ્ યુત્સુ પૃતનાસુ વહ્નયો યુવાં ક્ષેમસ્ય પ્રસવે મિતજ્ઞવઃ ।
ઈશાના વસ્વ ઉભયસ્ય કારવ ઇન્દ્રાવરુણા સુહવા હવામહે ॥

ઇન્દ્રાવરુણા યદ્ ઇમાનિ ચક્રથુર્ વિશ્વા જાતાનિ ભુવનસ્ય મજ્મના ।
ક્ષેમેણ મિત્રો વરુણં દુવસ્યતિ મરુદ્ભિર્ ઉગ્રઃ શુભમ્ અન્ય ઈયતે ॥

મહે શુલ્કાય વરુણસ્ય નુ ત્વિષ ઓજો મિમાતે ધ્રુવમ્ અસ્ય યત્ સ્વમ્ ।
અજામિમ્ અન્યઃ શ્નથયન્તમ્ આતિરદ્ દભ્રેભિર્ અન્યઃ પ્ર વૃણોતિ ભૂયસઃ ॥

ન તમ્ અંહો ન દુરિતાનિ મર્ત્યમ્ ઇન્દ્રાવરુણા ન તપઃ કુતશ્ ચન ।
યસ્ય દેવા ગચ્છથો વીથો અધ્વરં ન તમ્ મર્તસ્ય નશતે પરિહ્વૃતિઃ ॥

અર્વાઙ્ નરા દૈવ્યેનાવસા ગતં શૃણુતં હવં યદિ મે જુજોષથઃ ।
યુવોર્ હિ સખ્યમ્ ઉત વા યદ્ આપ્યમ્ માર્ડીકમ્ ઇન્દ્રાવરુણા નિ યચ્છતમ્ ॥

અસ્માકમ્ ઇન્દ્રાવરુણા ભરે-ભરે પુરોયોધા ભવતં કૃષ્ટ્યોજસા ।
યદ્ વાં હવન્ત ઉભયે અધ સ્પૃધિ નરસ્ તોકસ્ય તનયસ્ય સાતિષુ ॥

અસ્મે ઇન્દ્રો વરુણો મિત્રો અર્યમા દ્યુમ્નં યચ્છન્તુ મહિ શર્મ સપ્રથઃ ।
અવધ્રં જ્યોતિર્ અદિતેર્ ઋતાવૃધો દેવસ્ય શ્લોકં સવિતુર્ મનામહે ॥