ઋગ્વેદ · અધ્યાય 7.076

ઉદ્ ઉ જ્યોતિર્ અમૃતં વિશ્વજન્યં વિશ્વાનરઃ સવિતા દેવો અશ્રેત્ ।
ક્રત્વા દેવાનામ્ અજનિષ્ટ ચક્ષુર્ આવિર્ અકર્ ભુવનં વિશ્વમ્ ઉષાઃ ॥

પ્ર મે પન્થા દેવયાના અદૃશ્રન્ન્ અમર્ધન્તો વસુભિર્ ઇષ્કૃતાસઃ ।
અભૂદ્ ઉ કેતુર્ ઉષસઃ પુરસ્તાત્ પ્રતીચ્ય્ આગાદ્ અધિ હર્મ્યેભ્યઃ ॥

તાનીદ્ અહાનિ બહુલાન્ય્ આસન્ યા પ્રાચીનમ્ ઉદિતા સૂર્યસ્ય ।
યતઃ પરિ જાર ઇવાચરન્ત્ય્ ઉષો દદૃક્ષે ન પુનર્ યતીવ ॥

ત ઇદ્ દેવાનાં સધમાદ આસન્ન્ ઋતાવાનઃ કવયઃ પૂર્વ્યાસઃ ।
ગૂળ્હં જ્યોતિઃ પિતરો અન્વ્ અવિન્દન્ સત્યમન્ત્રા અજનયન્ન્ ઉષાસમ્ ॥

સમાન ઊર્વે અધિ સંગતાસઃ સં જાનતે ન યતન્તે મિથસ્ તે ।
તે દેવાનાં ન મિનન્તિ વ્રતાન્ય્ અમર્ધન્તો વસુભિર્ યાદમાનાઃ ॥

પ્રતિ ત્વા સ્તોમૈર્ ઈળતે વસિષ્ઠા ઉષર્બુધઃ સુભગે તુષ્ટુવાંસઃ ।
ગવાં નેત્રી વાજપત્ની ન ઉચ્છોષઃ સુજાતે પ્રથમા જરસ્વ ॥

એષા નેત્રી રાધસઃ સૂનૃતાનામ્ ઉષા ઉચ્છન્તી રિભ્યતે વસિષ્ઠૈઃ ।
દીર્ઘશ્રુતં રયિમ્ અસ્મે દધાના યૂયમ્ પાત સ્વસ્તિભિઃ સદા નઃ ॥