ઋગ્વેદ · અધ્યાય 7.065

પ્રતિ વાં સૂર ઉદિતે સૂક્તૈર્ મિત્રં હુવે વરુણમ્ પૂતદક્ષમ્ ।
યયોર્ અસુર્ય1મ્ અક્ષિતં જ્યેષ્ઠં વિશ્વસ્ય યામન્ન્ આચિતા જિગત્નુ ॥

તા હિ દેવાનામ્ અસુરા તાવ્ અર્યા તા નઃ ક્ષિતીઃ કરતમ્ ઊર્જયન્તીઃ ।
અશ્યામ મિત્રાવરુણા વયં વાં દ્યાવા ચ યત્ર પીપયન્ન્ અહા ચ ॥

તા ભૂરિપાશાવ્ અનૃતસ્ય સેતૂ દુરત્યેતૂ રિપવે મર્ત્યાય ।
ઋતસ્ય મિત્રાવરુણા પથા વામ્ અપો ન નાવા દુરિતા તરેમ ॥

આ નો મિત્રાવરુણા હવ્યજુષ્ટિં ઘૃતૈર્ ગવ્યૂતિમ્ ઉક્ષતમ્ ઇળાભિઃ ।
પ્રતિ વામ્ અત્ર વરમ્ આ જનાય પૃણીતમ્ ઉદ્નો દિવ્યસ્ય ચારોઃ ॥

એષ સ્તોમો વરુણ મિત્ર તુભ્યં સોમઃ શુક્રો ન વાયવે ઽયામિ ।
અવિષ્ટં ધિયો જિગૃતમ્ પુરંધીર્ યૂયમ્ પાત સ્વસ્તિભિઃ સદા નઃ ॥