ઋગ્વેદ · અધ્યાય 7.060

યદ્ અદ્ય સૂર્ય બ્રવો ઽનાગા ઉદ્યન્ મિત્રાય વરુણાય સત્યમ્ ।
વયં દેવત્રાદિતે સ્યામ તવ પ્રિયાસો અર્યમન્ ગૃણન્તઃ ॥

એષ સ્ય મિત્રાવરુણા નૃચક્ષા ઉભે ઉદ્ એતિ સૂર્યો અભિ જ્મન્ ।
વિશ્વસ્ય સ્થાતુર્ જગતશ્ ચ ગોપા ઋજુ મર્તેષુ વૃજિના ચ પશ્યન્ ॥

અયુક્ત સપ્ત હરિતઃ સધસ્થાદ્ યા ઈં વહન્તિ સૂર્યં ઘૃતાચીઃ ।
ધામાનિ મિત્રાવરુણા યુવાકુઃ સં યો યૂથેવ જનિમાનિ ચષ્ટે ॥

ઉદ્ વામ્ પૃક્ષાસો મધુમન્તો અસ્થુર્ આ સૂર્યો અરુહચ્ છુક્રમ્ અર્ણઃ ।
યસ્મા આદિત્યા અધ્વનો રદન્તિ મિત્રો અર્યમા વરુણઃ સજોષાઃ ॥

ઇમે ચેતારો અનૃતસ્ય ભૂરેર્ મિત્રો અર્યમા વરુણો હિ સન્તિ ।
ઇમ ઋતસ્ય વાવૃધુર્ દુરોણે શગ્માસઃ પુત્રા અદિતેર્ અદબ્ધાઃ ॥

ઇમે મિત્રો વરુણો દૂળભાસો ઽચેતસં ચિચ્ ચિતયન્તિ દક્ષૈઃ ।
અપિ ક્રતું સુચેતસં વતન્તસ્ તિરશ્ ચિદ્ અંહઃ સુપથા નયન્તિ ॥

ઇમે દિવો અનિમિષા પૃથિવ્યાશ્ ચિકિત્વાંસો અચેતસં નયન્તિ ।
પ્રવ્રાજે ચિન્ નદ્યો ગાધમ્ અસ્તિ પારં નો અસ્ય વિષ્પિતસ્ય પર્ષન્ ॥

યદ્ ગોપાવદ્ અદિતિઃ શર્મ ભદ્રમ્ મિત્રો યચ્છન્તિ વરુણઃ સુદાસે ।
તસ્મિન્ન્ આ તોકં તનયં દધાના મા કર્મ દેવહેળનં તુરાસઃ ॥

અવ વેદિં હોત્રાભિર્ યજેત રિપઃ કાશ્ ચિદ્ વરુણધ્રુતઃ સઃ ।
પરિ દ્વેષોભિર્ અર્યમા વૃણક્તૂરું સુદાસે વૃષણા ઉ લોકમ્ ॥

સસ્વશ્ ચિદ્ ધિ સમૃતિસ્ ત્વેષ્ય્ એષામ્ અપીચ્યેન સહસા સહન્તે ।
યુષ્મદ્ ભિયા વૃષણો રેજમાના દક્ષસ્ય ચિન્ મહિના મૃળતા નઃ ॥

યો બ્રહ્મણે સુમતિમ્ આયજાતે વાજસ્ય સાતૌ પરમસ્ય રાયઃ ।
સીક્ષન્ત મન્યુમ્ મઘવાનો અર્ય ઉરુ ક્ષયાય ચક્રિરે સુધાતુ ॥

ઇયં દેવ પુરોહિતિર્ યુવભ્યાં યજ્ઞેષુ મિત્રાવરુણાવ્ અકારિ ।
વિશ્વાનિ દુર્ગા પિપૃતં તિરો નો યૂયમ્ પાત સ્વસ્તિભિઃ સદા નઃ ॥