ઋગ્વેદ · અધ્યાય 7.041

પ્રાતર્ અગ્નિમ્ પ્રાતર્ ઇન્દ્રં હવામહે પ્રાતર્ મિત્રાવરુણા પ્રાતર્ અશ્વિના ।
પ્રાતર્ ભગમ્ પૂષણમ્ બ્રહ્મણસ્ પતિમ્ પ્રાતઃ સોમમ્ ઉત રુદ્રં હુવેમ ॥

પ્રાતર્જિતમ્ ભગમ્ ઉગ્રં હુવેમ વયમ્ પુત્રમ્ અદિતેર્ યો વિધર્તા ।
આધ્રશ્ ચિદ્ યમ્ મન્યમાનસ્ તુરશ્ ચિદ્ રાજા ચિદ્ યમ્ ભગમ્ ભક્ષીત્ય્ આહ ॥

ભગ પ્રણેતર્ ભગ સત્યરાધો ભગેમાં ધિયમ્ ઉદ્ અવા દદન્ નઃ ।
ભગ પ્ર ણો જનય ગોભિર્ અશ્વૈર્ ભગ પ્ર નૃભિર્ નૃવન્તઃ સ્યામ ॥

ઉતેદાનીમ્ ભગવન્તઃ સ્યામોત પ્રપિત્વ ઉત મધ્યે અહ્નામ્ ।
ઉતોદિતા મઘવન્ સૂર્યસ્ય વયં દેવાનાં સુમતૌ સ્યામ ॥

ભગ એવ ભગવાઁ અસ્તુ દેવાસ્ તેન વયમ્ ભગવન્તઃ સ્યામ ।
તં ત્વા ભગ સર્વ ઇજ્ જોહવીતિ સ નો ભગ પુરએતા ભવેહ ॥

સમ્ અધ્વરાયોષસો નમન્ત દધિક્રાવેવ શુચયે પદાય ।
અર્વાચીનં વસુવિદમ્ ભગં નો રથમ્ ઇવાશ્વા વાજિન આ વહન્તુ ॥

અશ્વાવતીર્ ગોમતીર્ ન ઉષાસો વીરવતીઃ સદમ્ ઉચ્છન્તુ ભદ્રાઃ ।
ઘૃતં દુહાના વિશ્વતઃ પ્રપીતા યૂયમ્ પાત સ્વસ્તિભિઃ સદા નઃ ॥