ઋગ્વેદ · અધ્યાય 7.021

અસાવિ દેવં ગોઋજીકમ્ અન્ધો ન્ય્ અસ્મિન્ન્ ઇન્દ્રો જનુષેમ્ ઉવોચ ।
બોધામસિ ત્વા હર્યશ્વ યજ્ઞૈર્ બોધા નઃ સ્તોમમ્ અન્ધસો મદેષુ ॥

પ્ર યન્તિ યજ્ઞં વિપયન્તિ બર્હિઃ સોમમાદો વિદથે દુધ્રવાચઃ ।
ન્ય્ ઉ ભ્રિયન્તે યશસો ગૃભાદ્ આ દૂરüપબ્દો વૃષણો નૃષાચઃ ॥

ત્વમ્ ઇન્દ્ર સ્રવિતવા અપસ્ કઃ પરિષ્ઠિતા અહિના શૂર પૂર્વીઃ ।
ત્વદ્ વાવક્રે રથ્યો3 ન ધેના રેજન્તે વિશ્વા કૃત્રિમાણિ ભીષા ॥

ભીમો વિવેષાયુધેભિર્ એષામ્ અપાંસિ વિશ્વા નર્યાણિ વિદ્વાન્ ।
ઇન્દ્રઃ પુરો જર્હૃષાણો વિ દૂધોદ્ વિ વજ્રહસ્તો મહિના જઘાન ॥

ન યાતવ ઇન્દ્ર જૂજુવુર્ નો ન વન્દના શવિષ્ઠ વેદ્યાભિઃ ।
સ શર્ધદ્ અર્યો વિષુણસ્ય જન્તોર્ મા શિશ્નદેવા અપિ ગુર્ ઋતં નઃ ॥

અભિ ક્રત્વેન્દ્ર ભૂર્ અધ જ્મન્ ન તે વિવ્યઙ્ મહિમાનં રજાંસિ ।
સ્વેના હિ વૃત્રં શવસા જઘન્થ ન શત્રુર્ અન્તં વિવિદદ્ યુધા તે ॥

દેવાશ્ ચિત્ તે અસુર્યાય પૂર્વે ઽનુ ક્ષત્રાય મમિરે સહાંસિ ।
ઇન્દ્રો મઘાનિ દયતે વિષહ્યેન્દ્રં વાજસ્ય જોહુવન્ત સાતૌ ॥

કીરિશ્ ચિદ્ ધિ ત્વામ્ અવસે જુહાવેશાનમ્ ઇન્દ્ર સૌભગસ્ય ભૂરેઃ ।
અવો બભૂથ શતમૂતે અસ્મે અભિક્ષત્તુસ્ ત્વાવતો વરૂતા ॥

સખાયસ્ ત ઇન્દ્ર વિશ્વહ સ્યામ નમોવૃધાસો મહિના તરુત્ર ।
વન્વન્તુ સ્મા તે ઽવસા સમીકે3 ઽભીતિમ્ અર્યો વનુષાં શવાંસિ ॥

સ ન ઇન્દ્ર ત્વયતાયા ઇષે ધાસ્ ત્મના ચ યે મઘવાનો જુનન્તિ ।
વસ્વી ષુ તે જરિત્રે અસ્તુ શક્તિર્ યૂયમ્ પાત સ્વસ્તિભિઃ સદા નઃ ॥