ઋગ્વેદ · અધ્યાય 6.061

ઇયમ્ અદદાદ્ રભસમ્ ઋણચ્યુતં દિવોદાસં વધ્ર્યશ્વાય દાશુષે ।
યા શશ્વન્તમ્ આચખાદાવસમ્ પણિં તા તે દાત્રાણિ તવિષા સરસ્વતિ ॥

ઇયં શુષ્મેભિર્ બિસખા ઇવારુજત્ સાનુ ગિરીણાં તવિષેભિર્ ઊર્મિભિઃ ।
પારાવતઘ્નીમ્ અવસે સુવૃક્તિભિઃ સરસ્વતીમ્ આ વિવાસેમ ધીતિભિઃ ॥

સરસ્વતિ દેવનિદો નિ બર્હય પ્રજાં વિશ્વસ્ય બૃસયસ્ય માયિનઃ ।
ઉત ક્ષિતિભ્યો ઽવનીર્ અવિન્દો વિષમ્ એભ્યો અસ્રવો વાજિનીવતિ ॥

પ્ર ણો દેવી સરસ્વતી વાજેભિર્ વાજિનીવતી ।
ધીનામ્ અવિત્ર્ય્ અવતુ ॥

યસ્ ત્વા દેવિ સરસ્વત્ય્ ઉપબ્રૂતે ધને હિતે ।
ઇન્દ્રં ન વૃત્રતૂર્યે ॥

ત્વં દેવિ સરસ્વત્ય્ અવા વાજેષુ વાજિનિ ।
રદા પૂષેવ નઃ સનિમ્ ॥

ઉત સ્યા નઃ સરસ્વતી ઘોરા હિરણ્યવર્તનિઃ ।
વૃત્રઘ્ની વષ્ટિ સુષ્ટુતિમ્ ॥

યસ્યા અનન્તો અહ્રુતસ્ ત્વેષશ્ ચરિષ્ણુર્ અર્ણવઃ ।
અમશ્ ચરતિ રોરુવત્ ॥

સા નો વિશ્વા અતિ દ્વિષઃ સ્વસૄર્ અન્યા ઋતાવરી ।
અતન્ન્ અહેવ સૂર્યઃ ॥

ઉત નઃ પ્રિયા પ્રિયાસુ સપ્તસ્વસા સુજુષ્ટા ।
સરસ્વતી સ્તોમ્યા ભૂત્ ॥

આપપ્રુષી પાર્થિવાન્ય્ ઉરુ રજો અન્તરિક્ષમ્ ।
સરસ્વતી નિદસ્ પાતુ ॥

ત્રિષધસ્થા સપ્તધાતુઃ પઞ્ચ જાતા વર્ધયન્તી ।
વાજે-વાજે હવ્યા ભૂત્ ॥

પ્ર યા મહિમ્ના મહિનાસુ ચેકિતે દ્યુમ્નેભિર્ અન્યા અપસામ્ અપસ્તમા ।
રથ ઇવ બૃહતી વિભ્વને કૃતોપસ્તુત્યા ચિકિતુષા સરસ્વતી ॥

સરસ્વત્ય્ અભિ નો નેષિ વસ્યો માપ સ્ફરીઃ પયસા મા ન આ ધક્ ।
જુષસ્વ નઃ સખ્યા વેશ્યા ચ મા ત્વત્ ક્ષેત્રાણ્ય્ અરણાનિ ગન્મ ॥