ઋગ્વેદ · અધ્યાય 6.053

વયમ્ ઉ ત્વા પથસ્ પતે રથં ન વાજસાતયે ।
ધિયે પૂષન્ન્ અયુજ્મહિ ॥

અભિ નો નર્યં વસુ વીરમ્ પ્રયતદક્ષિણમ્ ।
વામં ગૃહપતિં નય ॥

અદિત્સન્તં ચિદ્ આઘૃણે પૂષન્ દાનાય ચોદય ।
પણેશ્ ચિદ્ વિ મ્રદા મનઃ ॥

વિ પથો વાજસાતયે ચિનુહિ વિ મૃધો જહિ ।
સાધન્તામ્ ઉગ્ર નો ધિયઃ ॥

પરિ તૃન્ધિ પણીનામ્ આરયા હૃદયા કવે ।
અથેમ્ અસ્મભ્યં રન્ધય ॥

વિ પૂષન્ન્ આરયા તુદ પણેર્ ઇચ્છ હૃદિ પ્રિયમ્ ।
અથેમ્ અસ્મભ્યં રન્ધય ॥

આ રિખ કિકિરા કૃણુ પણીનાં હૃદયા કવે ।
અથેમ્ અસ્મભ્યં રન્ધય ॥

યામ્ પૂષન્ બ્રહ્મચોદનીમ્ આરામ્ બિભર્ષ્ય્ આઘૃણે ।
તયા સમસ્ય હૃદયમ્ આ રિખ કિકિરા કૃણુ ॥

યા તે અષ્ટ્રા ગોઓપશાઘૃણે પશુસાધની ।
તસ્યાસ્ તે સુમ્નમ્ ઈમહે ॥

ઉત નો ગોષણિં ધિયમ્ અશ્વસાં વાજસામ્ ઉત ।
નૃવત્ કૃણુહિ વીતયે ॥