ઋગ્વેદ · અધ્યાય 6.048

યજ્ઞા-યજ્ઞા વો અગ્નયે ગિરા-ગિરા ચ દક્ષસે ।
પ્ર-પ્ર વયમ્ અમૃતં જાતવેદસમ્ પ્રિયમ્ મિત્રં ન શંસિષમ્ ॥

ઊર્જો નપાતં સ હિનાયમ્ અસ્મયુર્ દાશેમ હવ્યદાતયે ।
ભુવદ્ વાજેષ્વ્ અવિતા ભુવદ્ વૃધ ઉત ત્રાતા તનૂનામ્ ॥

વૃષા હ્ય્ અગ્ને અજરો મહાન્ વિભાસ્ય્ અર્ચિષા ।
અજસ્રેણ શોચિષા શોશુચચ્ છુચે સુદીતિભિઃ સુ દીદિહિ ॥

મહો દેવાન્ યજસિ યક્ષ્ય્ આનુષક્ તવ ક્રત્વોત દંસના ।
અર્વાચઃ સીં કૃણુહ્ય્ અગ્ને ઽવસે રાસ્વ વાજોત વંસ્વ ॥

યમ્ આપો અદ્રયો વના ગર્ભમ્ ઋતસ્ય પિપ્રતિ ।
સહસા યો મથિતો જાયતે નૃભિઃ પૃથિવ્યા અધિ સાનવિ ॥

આ યઃ પપ્રૌ ભાનુના રોદસી ઉભે ધૂમેન ધાવતે દિવિ ।
તિરસ્ તમો દદૃશ ઊર્મ્યાસ્વ્ આ શ્યાવાસ્વ્ અરુષો વૃષા શ્યાવા અરુષો વૃષા ॥

બૃહદ્ભિર્ અગ્ને અર્ચિભિઃ શુક્રેણ દેવ શોચિષા ।
ભરદ્વાજે સમિધાનો યવિષ્ઠ્ય રેવન્ નઃ શુક્ર દીદિહિ દ્યુમત્ પાવક દીદિહિ ॥

વિશ્વાસાં ગૃહપતિર્ વિશામ્ અસિ ત્વમ્ અગ્ને માનુષીણામ્ ।
શતમ્ પૂર્ભિર્ યવિષ્ઠ પાહ્ય્ અંહસઃ સમેદ્ધારં શતં હિમાઃ સ્તોતૃભ્યો યે ચ દદતિ ॥

ત્વં નશ્ ચિત્ર ઊત્યા વસો રાધાંસિ ચોદય ।
અસ્ય રાયસ્ ત્વમ્ અગ્ને રથીર્ અસિ વિદા ગાધં તુચે તુ નઃ ॥

પર્ષિ તોકં તનયમ્ પર્તૃભિષ્ ટ્વમ્ અદબ્ધૈર્ અપ્રયુત્વભિઃ ।
અગ્ને હેળાંસિ દૈવ્યા યુયોધિ નો ઽદેવાનિ હ્વરાંસિ ચ ॥

આ સખાયઃ સબર્દુઘાં ધેનુમ્ અજધ્વમ્ ઉપ નવ્યસા વચઃ ।
સૃજધ્વમ્ અનપસ્ફુરામ્ ॥

યા શર્ધાય મારુતાય સ્વભાનવે શ્રવો ઽમૃત્યુ ધુક્ષત ।
યા મૃળીકે મરુતાં તુરાણાં યા સુમ્નૈર્ એવયાવરી ॥

ભરદ્વાજાયાવ ધુક્ષત દ્વિતા ।
ધેનું ચ વિશ્વદોહસમ્ ઇષં ચ વિશ્વભોજસમ્ ॥

તં વ ઇન્દ્રં ન સુક્રતું વરુણમ્ ઇવ માયિનમ્ ।
અર્યમણં ન મન્દ્રં સૃપ્રભોજસં વિષ્ણું ન સ્તુષ આદિશે ॥

ત્વેષં શર્ધો ન મારુતં તુવિષ્વણ્ય્ અનર્વાણમ્ પૂષણં સં યથા શતા ।
સં સહસ્રા કારિષચ્ ચર્ષણિભ્ય આઁ આવિર્ ગૂળ્હા વસૂ કરત્ સુવેદા નો વસૂ કરત્ ॥

આ મા પૂષન્ન્ ઉપ દ્રવ શંસિષં નુ તે અપિકર્ણ આઘૃણે ।
અઘા અર્યો અરાતયઃ ॥

મા કાકમ્બીરમ્ ઉદ્ વૃહો વનસ્પતિમ્ અશસ્તીર્ વિ હિ નીનશઃ ।
મોત સૂરો અહ એવા ચન ગ્રીવા આદધતે વેઃ ॥

દૃતેર્ ઇવ તે ઽવૃકમ્ અસ્તુ સખ્યમ્ ।
અચ્છિદ્રસ્ય દધન્વતઃ સુપૂર્ણસ્ય દધન્વતઃ ॥

પરો હિ મર્ત્યૈર્ અસિ સમો દેવૈર્ ઉત શ્રિયા ।
અભિ ખ્યઃ પૂષન્ પૃતનાસુ નસ્ ત્વમ્ અવા નૂનં યથા પુરા ॥

વામી વામસ્ય ધૂતયઃ પ્રણીતિર્ અસ્તુ સૂનૃતા ।
દેવસ્ય વા મરુતો મર્ત્યસ્ય વેજાનસ્ય પ્રયજ્યવઃ ॥

સદ્યશ્ ચિદ્ યસ્ય ચર્કૃતિઃ પરિ દ્યાં દેવો નૈતિ સૂર્યઃ ।
ત્વેષં શવો દધિરે નામ યજ્ઞિયમ્ મરુતો વૃત્રહં શવો જ્યેષ્ઠં વૃત્રહં શવઃ ॥

સકૃદ્ ધ દ્યૌર્ અજાયત સકૃદ્ ભૂમિર્ અજાયત ।
પૃશ્ન્યા દુગ્ધં સકૃત્ પયસ્ તદ્ અન્યો નાનુ જાયતે ॥