ઋગ્વેદ · અધ્યાય 6.028

આ ગાવો અગ્મન્ન્ ઉત ભદ્રમ્ અક્રન્ સીદન્તુ ગોષ્ઠે રણયન્ત્વ્ અસ્મે ।
પ્રજાવતીઃ પુરુરૂપા ઇહ સ્યુર્ ઇન્દ્રાય પૂર્વીર્ ઉષસો દુહાનાઃ ॥

ઇન્દ્રો યજ્વને પૃણતે ચ શિક્ષત્ય્ ઉપેદ્ દદાતિ ન સ્વમ્ મુષાયતિ ।
ભૂયો-ભૂયો રયિમ્ ઇદ્ અસ્ય વર્ધયન્ન્ અભિન્ને ખિલ્યે નિ દધાતિ દેવયુમ્ ॥

ન તા નશન્તિ ન દભાતિ તસ્કરો નાસામ્ આમિત્રો વ્યથિર્ આ દધર્ષતિ ।
દેવાઁશ્ ચ યાભિર્ યજતે દદાતિ ચ જ્યોગ્ ઇત્ તાભિઃ સચતે ગોપતિઃ સહ ॥

ન તા અર્વા રેણુકકાટો અશ્નુતે ન સંસ્કૃતત્રમ્ ઉપ યન્તિ તા અભિ ।
ઉરુગાયમ્ અભયં તસ્ય તા અનુ ગાવો મર્તસ્ય વિ ચરન્તિ યજ્વનઃ ॥

ગાવો ભગો ગાવ ઇન્દ્રો મે અચ્છાન્ ગાવઃ સોમસ્ય પ્રથમસ્ય ભક્ષઃ ।
ઇમા યા ગાવઃ સ જનાસ ઇન્દ્ર ઇચ્છામીદ્ ધૃદા મનસા ચિદ્ ઇન્દ્રમ્ ॥

યૂયં ગાવો મેદયથા કૃશં ચિદ્ અશ્રીરં ચિત્ કૃણુથા સુપ્રતીકમ્ ।
ભદ્રં ગૃહં કૃણુથ ભદ્રવાચો બૃહદ્ વો વય ઉચ્યતે સભાસુ ॥

પ્રજાવતીઃ સૂયવસં રિશન્તીઃ શુદ્ધા અપઃ સુપ્રપાણે પિબન્તીઃ ।
મા વઃ સ્તેન ઈશત માઘશંસઃ પરિ વો હેતી રુદ્રસ્ય વૃજ્યાઃ ॥

ઉપેદમ્ ઉપપર્ચનમ્ આસુ ગોષૂપ પૃચ્યતામ્ ।
ઉપ ઋષભસ્ય રેતસ્ય્ ઉપેન્દ્ર તવ વીર્યે ॥