ઋગ્વેદ · અધ્યાય 6.003

અગ્ને સ ક્ષેષદ્ ઋતપા ઋતેજા ઉરુ જ્યોતિર્ નશતે દેવયુષ્ ટે ।
યં ત્વમ્ મિત્રેણ વરુણઃ સજોષા દેવ પાસિ ત્યજસા મર્તમ્ અંહઃ ॥

ઈજે યજ્ઞેભિઃ શશમે શમીભિર્ ઋધદ્વારાયાગ્નયે દદાશ ।
એવા ચન તં યશસામ્ અજુષ્ટિર્ નાંહો મર્તં નશતે ન પ્રદૃપ્તિઃ ॥

સૂરો ન યસ્ય દૃશતિર્ અરેપા ભીમા યદ્ એતિ શુચતસ્ ત આ ધીઃ ।
હેષસ્વતઃ શુરુધો નાયમ્ અક્તોઃ કુત્રા ચિદ્ રણ્વો વસતિર્ વનેજાઃ ॥

તિગ્મં ચિદ્ એમ મહિ વર્પો અસ્ય ભસદ્ અશ્વો ન યમસાન આસા ।
વિજેહમાનઃ પરશુર્ ન જિહ્વાં દ્રવિર્ ન દ્રાવયતિ દારુ ધક્ષત્ ॥

સ ઇદ્ અસ્તેવ પ્રતિ ધાદ્ અસિષ્યઞ્ છિશીત તેજો ઽયસો ન ધારામ્ ।
ચિત્રધ્રજતિર્ અરતિર્ યો અક્તોર્ વેર્ ન દ્રુષદ્વા રઘુપત્મજંહાઃ ॥

સ ઈં રેભો ન પ્રતિ વસ્ત ઉસ્રાઃ શોચિષા રારપીતિ મિત્રમહાઃ ।
નક્તં ય ઈમ્ અરુષો યો દિવા નૄન્ અમર્ત્યો અરુષો યો દિવા નૄન્ ॥

દિવો ન યસ્ય વિધતો નવીનોદ્ વૃષા રુક્ષ ઓષધીષુ નૂનોત્ ।
ઘૃણા ન યો ધ્રજસા પત્મના યન્ન્ આ રોદસી વસુના દં સુપત્ની ॥

ધાયોભિર્ વા યો યુજ્યેભિર્ અર્કૈર્ વિદ્યુન્ ન દવિદ્યોત્ સ્વેભિઃ શુષ્મૈઃ ।
શર્ધો વા યો મરુતાં તતક્ષ ઋભુર્ ન ત્વેષો રભસાનો અદ્યૌત્ ॥