ઋગ્વેદ · અધ્યાય 5.081

યુઞ્જતે મન ઉત યુઞ્જતે ધિયો વિપ્રા વિપ્રસ્ય બૃહતો વિપશ્ચિતઃ ।
વિ હોત્રા દધે વયુનાવિદ્ એક ઇન્ મહી દેવસ્ય સવિતુઃ પરિષ્ટુતિઃ ॥

વિશ્વા રૂપાણિ પ્રતિ મુઞ્ચતે કવિઃ પ્રાસાવીદ્ ભદ્રં દ્વિપદે ચતુષ્પદે ।
વિ નાકમ્ અખ્યત્ સવિતા વરેણ્યો ઽનુ પ્રયાણમ્ ઉષસો વિ રાજતિ ॥

યસ્ય પ્રયાણમ્ અન્વ્ અન્ય ઇદ્ યયુર્ દેવા દેવસ્ય મહિમાનમ્ ઓજસા ।
યઃ પાર્થિવાનિ વિમમે સ એતશો રજાંસિ દેવઃ સવિતા મહિત્વના ॥

ઉત યાસિ સવિતસ્ ત્રીણિ રોચનોત સૂર્યસ્ય રશ્મિભિઃ સમ્ ઉચ્યસિ ।
ઉત રાત્રીમ્ ઉભયતઃ પરીયસ ઉત મિત્રો ભવસિ દેવ ધર્મભિઃ ॥

ઉતેશિષે પ્રસવસ્ય ત્વમ્ એક ઇદ્ ઉત પૂષા ભવસિ દેવ યામભિઃ ।
ઉતેદં વિશ્વમ્ ભુવનં વિ રાજસિ શ્યાવાશ્વસ્ તે સવિતઃ સ્તોમમ્ આનશે ॥