ઋગ્વેદ · અધ્યાય 5.065

યશ્ ચિકેત સ સુક્રતુર્ દેવત્રા સ બ્રવીતુ નઃ ।
વરુણો યસ્ય દર્શતો મિત્રો વા વનતે ગિરઃ ॥

તા હિ શ્રેષ્ઠવર્ચસા રાજાના દીર્ઘશ્રુત્તમા ।
તા સત્પતી ઋતાવૃધ ઋતાવાના જને-જને ॥

તા વામ્ ઇયાનો ઽવસે પૂર્વા ઉપ બ્રુવે સચા ।
સ્વશ્વાસઃ સુ ચેતુના વાજાઁ અભિ પ્ર દાવને ॥

મિત્રો અંહોશ્ ચિદ્ આદ્ ઉરુ ક્ષયાય ગાતું વનતે ।
મિત્રસ્ય હિ પ્રતૂર્વતઃ સુમતિર્ અસ્તિ વિધતઃ ॥

વયમ્ મિત્રસ્યાવસિ સ્યામ સપ્રથસ્તમે ।
અનેહસસ્ ત્વોતયઃ સત્રા વરુણશેષસઃ ॥

યુવમ્ મિત્રેમં જનં યતથઃ સં ચ નયથઃ ।
મા મઘોનઃ પરિ ખ્યતમ્ મો અસ્માકમ્ ઋષીણાં ગોપીથે ન ઉરુષ્યતમ્ ॥