ઋગ્વેદ · અધ્યાય 5.061

કે ષ્ઠા નરઃ શ્રેષ્ઠતમા ય એક-એક આયય ।
પરમસ્યાઃ પરાવતઃ ॥

ક્વ1 વો ઽશ્વાઃ ક્વા3ભીશવઃ કથં શેક કથા યય ।
પૃષ્ઠે સદો નસોર્ યમઃ ॥

જઘને ચોદ એષાં વિ સક્થાનિ નરો યમુઃ ।
પુત્રકૃથે ન જનયઃ ॥

પરા વીરાસ એતન મર્યાસો ભદ્રજાનયઃ ।
અગ્નિતપો યથાસથ ॥

સનત્ સાશ્વ્યમ્ પશુમ્ ઉત ગવ્યં શતાવયમ્ ।
શ્યાવાશ્વસ્તુતાય યા દોર્ વીરાયોપબર્બૃહત્ ॥

ઉત ત્વા સ્ત્રી શશીયસી પુંસો ભવતિ વસ્યસી ।
અદેવત્રાદ્ અરાધસઃ ॥

વિ યા જાનાતિ જસુરિં વિ તૃષ્યન્તં વિ કામિનમ્ ।
દેવત્રા કૃણુતે મનઃ ॥

ઉત ઘા નેમો અસ્તુતઃ પુમાઁ ઇતિ બ્રુવે પણિઃ ।
સ વૈરદેય ઇત્ સમઃ ॥

ઉત મે ઽરપદ્ યુવતિર્ મમન્દુષી પ્રતિ શ્યાવાય વર્તનિમ્ ।
વિ રોહિતા પુરુમીળ્હાય યેમતુર્ વિપ્રાય દીર્ઘયશસે ॥

યો મે ધેનૂનાં શતં વૈદદશ્વિર્ યથા દદત્ ।
તરન્ત ઇવ મંહના ॥

ય ઈં વહન્ત આશુભિઃ પિબન્તો મદિરમ્ મધુ ।
અત્ર શ્રવાંસિ દધિરે ॥

યેષાં શ્રિયાધિ રોદસી વિભ્રાજન્તે રથેષ્વ્ આ ।
દિવિ રુક્મ ઇવોપરિ ॥

યુવા સ મારુતો ગણસ્ ત્વેષરથો અનેદ્યઃ ।
શુભંયાવાપ્રતિષ્કુતઃ ॥

કો વેદ નૂનમ્ એષાં યત્રા મદન્તિ ધૂતયઃ ।
ઋતજાતા અરેપસઃ ॥

યૂયમ્ મર્તં વિપન્યવઃ પ્રણેતાર ઇત્થા ધિયા ।
શ્રોતારો યામહૂતિષુ ॥

તે નો વસૂનિ કામ્યા પુરુશ્ચન્દ્રા રિશાદસઃ ।
આ યજ્ઞિયાસો વવૃત્તન ॥

એતમ્ મે સ્તોમમ્ ઊર્મ્યે દાર્ભ્યાય પરા વહ ।
ગિરો દેવિ રથીર્ ઇવ ॥

ઉત મે વોચતાદ્ ઇતિ સુતસોમે રથવીતૌ ।
ન કામો અપ વેતિ મે ॥

એષ ક્ષેતિ રથવીતિર્ મઘવા ગોમતીર્ અનુ ।
પર્વતેષ્વ્ અપશ્રિતઃ ॥