ઋગ્વેદ · અધ્યાય 5.004

ત્વામ્ અગ્ને વસુપતિં વસૂનામ્ અભિ પ્ર મન્દે અધ્વરેષુ રાજન્ ।
ત્વયા વાજં વાજયન્તો જયેમાભિ ષ્યામ પૃત્સુતીર્ મર્ત્યાનામ્ ॥

હવ્યવાળ્ અગ્નિર્ અજરઃ પિતા નો વિભુર્ વિભાવા સુદૃશીકો અસ્મે ।
સુગાર્હપત્યાઃ સમ્ ઇષો દિદીહ્ય્ અસ્મદ્ર્ય1ક્ સમ્ મિમીહિ શ્રવાંસિ ॥

વિશાં કવિં વિશ્પતિમ્ માનુષીણાં શુચિમ્ પાવકં ઘૃતપૃષ્ઠમ્ અગ્નિમ્ ।
નિ હોતારં વિશ્વવિદં દધિધ્વે સ દેવેષુ વનતે વાર્યાણિ ॥

જુષસ્વાગ્ન ઇળયા સજોષા યતમાનો રશ્મિભિઃ સૂર્યસ્ય ।
જુષસ્વ નઃ સમિધં જાતવેદ આ ચ દેવાન્ હવિરદ્યાય વક્ષિ ॥

જુષ્ટો દમૂના અતિથિર્ દુરોણ ઇમં નો યજ્ઞમ્ ઉપ યાહિ વિદ્વાન્ ।
વિશ્વા અગ્ને અભિયુજો વિહત્યા શત્રૂયતામ્ આ ભરા ભોજનાનિ ॥

વધેન દસ્યુમ્ પ્ર હિ ચાતયસ્વ વયઃ કૃણ્વાનસ્ તન્વે3 સ્વાયૈ ।
પિપર્ષિ યત્ સહસસ્ પુત્ર દેવાન્ત્ સો અગ્ને પાહિ નૃતમ વાજે અસ્માન્ ॥

વયં તે અગ્ન ઉક્થૈર્ વિધેમ વયં હવ્યૈઃ પાવક ભદ્રશોચે ।
અસ્મે રયિં વિશ્વવારં સમ્ ઇન્વાસ્મે વિશ્વાનિ દ્રવિણાનિ ધેહિ ॥

અસ્માકમ્ અગ્ને અધ્વરં જુષસ્વ સહસઃ સૂનો ત્રિષધસ્થ હવ્યમ્ ।
વયં દેવેષુ સુકૃતઃ સ્યામ શર્મણા નસ્ ત્રિવરૂથેન પાહિ ॥

વિશ્વાનિ નો દુર્ગહા જાતવેદઃ સિન્ધું ન નાવા દુરિતાતિ પર્ષિ ।
અગ્ને અત્રિવન્ નમસા ગૃણાનો3 ઽસ્માકમ્ બોધ્ય્ અવિતા તનૂનામ્ ॥

યસ્ ત્વા હૃદા કીરિણા મન્યમાનો ઽમર્ત્યમ્ મર્ત્યો જોહવીમિ ।
જાતવેદો યશો અસ્માસુ ધેહિ પ્રજાભિર્ અગ્ને અમૃતત્વમ્ અશ્યામ્ ॥

યસ્મૈ ત્વં સુકૃતે જાતવેદ ઉ લોકમ્ અગ્ને કૃણવઃ સ્યોનમ્ ।
અશ્વિનં સ પુત્રિણં વીરવન્તં ગોમન્તં રયિં નશતે સ્વસ્તિ ॥