ઋગ્વેદ · અધ્યાય 4.042

મમ દ્વિતા રાષ્ટ્રં ક્ષત્રિયસ્ય વિશ્વાયોર્ વિશ્વે અમૃતા યથા નઃ ।
ક્રતું સચન્તે વરુણસ્ય દેવા રાજામિ કૃષ્ટેર્ ઉપમસ્ય વવ્રેઃ ॥

અહં રાજા વરુણો મહ્યં તાન્ય્ અસુર્યાણિ પ્રથમા ધારયન્ત ।
ક્રતું સચન્તે વરુણસ્ય દેવા રાજામિ કૃષ્ટેર્ ઉપમસ્ય વવ્રેઃ ॥

અહમ્ ઇન્દ્રો વરુણસ્ તે મહિત્વોર્વી ગભીરે રજસી સુમેકે ।
ત્વષ્ટેવ વિશ્વા ભુવનાનિ વિદ્વાન્ સમ્ ઐરયં રોદસી ધારયં ચ ॥

અહમ્ અપો અપિન્વમ્ ઉક્ષમાણા ધારયં દિવં સદન ઋતસ્ય ।
ઋતેન પુત્રો અદિતેર્ ઋતાવોત ત્રિધાતુ પ્રથયદ્ વિ ભૂમ ॥

માં નરઃ સ્વશ્વા વાજયન્તો માં વૃતાઃ સમરણે હવન્તે ।
કૃણોમ્ય્ આજિમ્ મઘવાહમ્ ઇન્દ્ર ઇયર્મિ રેણુમ્ અભિભૂત્યોજાઃ ॥

અહં તા વિશ્વા ચકરં નકિર્ મા દૈવ્યં સહો વરતે અપ્રતીતમ્ ।
યન્ મા સોમાસો મમદન્ યદ્ ઉક્થોભે ભયેતે રજસી અપારે ॥

વિદુષ્ ટે વિશ્વા ભુવનાનિ તસ્ય તા પ્ર બ્રવીષિ વરુણાય વેધઃ ।
ત્વં વૃત્રાણિ શૃણ્વિષે જઘન્વાન્ ત્વં વૃતાઁ અરિણા ઇન્દ્ર સિન્ધૂન્ ॥

અસ્માકમ્ અત્ર પિતરસ્ ત આસન્ સપ્ત ઋષયો દૌર્ગહે બધ્યમાને ।
ત આયજન્ત ત્રસદસ્યુમ્ અસ્યા ઇન્દ્રં ન વૃત્રતુરમ્ અર્ધદેવમ્ ॥

પુરુકુત્સાની હિ વામ્ અદાશદ્ ધવ્યેભિર્ ઇન્દ્રાવરુણા નમોભિઃ ।
અથા રાજાનં ત્રસદસ્યુમ્ અસ્યા વૃત્રહણં દદથુર્ અર્ધદેવમ્ ॥

રાયા વયં સસવાંસો મદેમ હવ્યેન દેવા યવસેન ગાવઃ ।
તાં ધેનુમ્ ઇન્દ્રાવરુણા યુવં નો વિશ્વાહા ધત્તમ્ અનપસ્ફુરન્તીમ્ ॥