ઋગ્વેદ · અધ્યાય 4.036

અનશ્વો જાતો અનભીશુર્ ઉક્થ્યો3 રથસ્ ત્રિચક્રઃ પરિ વર્તતે રજઃ ।
મહત્ તદ્ વો દેવ્યસ્ય પ્રવાચનં દ્યામ્ ઋભવઃ પૃથિવીં યચ્ ચ પુષ્યથ ॥

રથં યે ચક્રુઃ સુવૃતં સુચેતસો ઽવિહ્વરન્તમ્ મનસસ્ પરિ ધ્યયા ।
તાઁ ઊ ન્વ્ અ1સ્ય સવનસ્ય પીતય આ વો વાજા ઋભવો વેદયામસિ ॥

તદ્ વો વાજા ઋભવઃ સુપ્રવાચનં દેવેષુ વિભ્વો અભવન્ મહિત્વનમ્ ।
જિવ્રી યત્ સન્તા પિતરા સનાજુરા પુનર્ યુવાના ચરથાય તક્ષથ ॥

એકં વિ ચક્ર ચમસં ચતુર્વયં નિશ્ ચર્મણો ગામ્ અરિણીત ધીતિભિઃ ।
અથા દેવેષ્વ્ અમૃતત્વમ્ આનશ શ્રુષ્ટી વાજા ઋભવસ્ તદ્ વ ઉક્થ્યમ્ ॥

ઋભુતો રયિઃ પ્રથમશ્રવસ્તમો વાજશ્રુતાસો યમ્ અજીજનન્ નરઃ ।
વિભ્વતષ્ટો વિદથેષુ પ્રવાચ્યો યં દેવાસો ઽવથા સ વિચર્ષણિઃ ॥

સ વાજ્ય્ અર્વા સ ઋષિર્ વચસ્યયા સ શૂરો અસ્તા પૃતનાસુ દુષ્ટરઃ ।
સ રાયસ્ પોષં સ સુવીર્યં દધે યં વાજો વિભ્વાઁ ઋભવો યમ્ આવિષુઃ ॥

શ્રેષ્ઠં વઃ પેશો અધિ ધાયિ દર્શતં સ્તોમો વાજા ઋભવસ્ તં જુજુષ્ટન ।
ધીરાસો હિ ષ્ઠા કવયો વિપશ્ચિતસ્ તાન્ વ એના બ્રહ્મણા વેદયામસિ ॥

યૂયમ્ અસ્મભ્યં ધિષણાભ્યસ્ પરિ વિદ્વાંસો વિશ્વા નર્યાણિ ભોજના ।
દ્યુમન્તં વાજં વૃષશુષ્મમ્ ઉત્તમમ્ આ નો રયિમ્ ઋભવસ્ તક્ષતા વયઃ ॥

ઇહ પ્રજામ્ ઇહ રયિં રરાણા ઇહ શ્રવો વીરવત્ તક્ષતા નઃ ।
યેન વયં ચિતયેમાત્ય્ અન્યાન્ તં વાજં ચિત્રમ્ ઋભવો દદા નઃ ॥