ઋગ્વેદ · અધ્યાય 4.029

આ નઃ સ્તુત ઉપ વાજેભિર્ ઊતી ઇન્દ્ર યાહિ હરિભિર્ મન્દસાનઃ ।
તિરશ્ ચિદ્ અર્યઃ સવના પુરૂણ્ય્ આઙ્ગૂષેભિર્ ગૃણાનઃ સત્યરાધાઃ ॥

આ હિ ષ્મા યાતિ નર્યશ્ ચિકિત્વાન્ હૂયમાનઃ સોતૃભિર્ ઉપ યજ્ઞમ્ ।
સ્વશ્વો યો અભીરુર્ મન્યમાનઃ સુષ્વાણેભિર્ મદતિ સં હ વીરૈઃ ॥

શ્રાવયેદ્ અસ્ય કર્ણા વાજયધ્યૈ જુષ્ટામ્ અનુ પ્ર દિશમ્ મન્દયધ્યૈ ।
ઉદ્વાવૃષાણો રાધસે તુવિષ્માન્ કરન્ ન ઇન્દ્રઃ સુતીર્થાભયં ચ ॥

અચ્છા યો ગન્તા નાધમાનમ્ ઊતી ઇત્થા વિપ્રં હવમાનં ગૃણન્તમ્ ।
ઉપ ત્મનિ દધાનો ધુર્ય્ આ3શૂન્ સહસ્રાણિ શતાનિ વજ્રબાહુઃ ॥

ત્વોતાસો મઘવન્ન્ ઇન્દ્ર વિપ્રા વયં તે સ્યામ સૂરયો ગૃણન્તઃ ।
ભેજાનાસો બૃહદ્દિવસ્ય રાય આકાય્યસ્ય દાવને પુરુક્ષોઃ ॥