ઋગ્વેદ · અધ્યાય 4.021

આ યાત્વ્ ઇન્દ્રો ઽવસ ઉપ ન ઇહ સ્તુતઃ સધમાદ્ અસ્તુ શૂરઃ ।
વાવૃધાનસ્ તવિષીર્ યસ્ય પૂર્વીર્ દ્યૌર્ ન ક્ષત્રમ્ અભિભૂતિ પુષ્યાત્ ॥

તસ્યેદ્ ઇહ સ્તવથ વૃષ્ણ્યાનિ તુવિદ્યુમ્નસ્ય તુવિરાધસો નૄન્ ।
યસ્ય ક્રતુર્ વિદથ્યો3 ન સમ્રાટ્ સાહ્વાન્ તરુત્રો અભ્ય્ અસ્તિ કૃષ્ટીઃ ॥

આ યાત્વ્ ઇન્દ્રો દિવ આ પૃથિવ્યા મક્ષૂ સમુદ્રાદ્ ઉત વા પુરીષાત્ ।
સ્વર્ણરાદ્ અવસે નો મરુત્વાન્ પરાવતો વા સદનાદ્ ઋતસ્ય ॥

સ્થૂરસ્ય રાયો બૃહતો ય ઈશે તમ્ ઉ ષ્ટવામ વિદથેષ્વ્ ઇન્દ્રમ્ ।
યો વાયુના જયતિ ગોમતીષુ પ્ર ધૃષ્ણુયા નયતિ વસ્યો અચ્છ ॥

ઉપ યો નમો નમસિ સ્તભાયન્ન્ ઇયર્તિ વાચં જનયન્ યજધ્યૈ ।
ઋઞ્જસાનઃ પુરુવાર ઉક્થૈર્ એન્દ્રં કૃણ્વીત સદનેષુ હોતા ॥

ધિષા યદિ ધિષણ્યન્તઃ સરણ્યાન્ સદન્તો અદ્રિમ્ ઔશિજસ્ય ગોહે ।
આ દુરોષાઃ પાસ્ત્યસ્ય હોતા યો નો મહાન્ સંવરણેષુ વહ્નિઃ ॥

સત્રા યદ્ ઈમ્ ભાર્વરસ્ય વૃષ્ણઃ સિષક્તિ શુષ્મઃ સ્તુવતે ભરાય ।
ગુહા યદ્ ઈમ્ ઔશિજસ્ય ગોહે પ્ર યદ્ ધિયે પ્રાયસે મદાય ॥

વિ યદ્ વરાંસિ પર્વતસ્ય વૃણ્વે પયોભિર્ જિન્વે અપાં જવાંસિ ।
વિદદ્ ગૌરસ્ય ગવયસ્ય ગોહે યદી વાજાય સુધ્યો3 વહન્તિ ॥

ભદ્રા તે હસ્તા સુકૃતોત પાણી પ્રયન્તારા સ્તુવતે રાધ ઇન્દ્ર ।
કા તે નિષત્તિઃ કિમ્ ઉ નો મમત્સિ કિં નોદ્-ઉદ્ ઉ હર્ષસે દાતવા ઉ ॥

એવા વસ્વ ઇન્દ્રઃ સત્યઃ સમ્રાડ્ ઢન્તા વૃત્રં વરિવઃ પૂરવે કઃ ।
પુરુષ્ટુત ક્રત્વા નઃ શગ્ધિ રાયો ભક્ષીય તે ઽવસો દૈવ્યસ્ય ॥

નૂ ષ્ટુત ઇન્દ્ર નૂ ગૃણાન ઇષં જરિત્રે નદ્યો3 ન પીપેઃ ।
અકારિ તે હરિવો બ્રહ્મ નવ્યં ધિયા સ્યામ રથ્યઃ સદાસાઃ ॥