ઋગ્વેદ · અધ્યાય 4.008

દૂતં વો વિશ્વવેદસં હવ્યવાહમ્ અમર્ત્યમ્ ।
યજિષ્ઠમ્ ઋઞ્જસે ગિરા ॥

સ હિ વેદા વસુધિતિમ્ મહાઁ આરોધનં દિવઃ ।
સ દેવાઁ એહ વક્ષતિ ॥

સ વેદ દેવ આનમં દેવાઁ ઋતાયતે દમે ।
દાતિ પ્રિયાણિ ચિદ્ વસુ ॥

સ હોતા સેદ્ ઉ દૂત્યં ચિકિત્વાઁ અન્તર્ ઈયતે ।
વિદ્વાઁ આરોધનં દિવઃ ॥

તે સ્યામ યે અગ્નયે દદાશુર્ હવ્યદાતિભિઃ ।
ય ઈમ્ પુષ્યન્ત ઇન્ધતે ॥

તે રાયા તે સુવીર્યૈઃ સસવાંસો વિ શૃણ્વિરે ।
યે અગ્ના દધિરે દુવઃ ॥

અસ્મે રાયો દિવે-દિવે સં ચરન્તુ પુરુસ્પૃહઃ ।
અસ્મે વાજાસ ઈરતામ્ ॥

સ વિપ્રશ્ ચર્ષણીનાં શવસા માનુષાણામ્ ।
અતિ ક્ષિપ્રેવ વિધ્યતિ ॥