ઋગ્વેદ · અધ્યાય 3.055

ઉષસઃ પૂર્વા અધ યદ્ વ્યૂષુર્ મહદ્ વિ જજ્ઞે અક્ષરમ્ પદે ગોઃ ।
વ્રતા દેવાનામ્ ઉપ નુ પ્રભૂષન્ મહદ્ દેવાનામ્ અસુરત્વમ્ એકમ્ ॥

મો ષૂ ણો અત્ર જુહુરન્ત દેવા મા પૂર્વે અગ્ને પિતરઃ પદજ્ઞાઃ ।
પુરાણ્યોઃ સદ્મનોઃ કેતુર્ અન્તર્ મહદ્ દેવાનામ્ અસુરત્વમ્ એકમ્ ॥

વિ મે પુરુત્રા પતયન્તિ કામાઃ શમ્ય્ અચ્છા દીદ્યે પૂર્વ્યાણિ ।
સમિદ્ધે અગ્નાવ્ ઋતમ્ ઇદ્ વદેમ મહદ્ દેવાનામ્ અસુરત્વમ્ એકમ્ ॥

સમાનો રાજા વિભૃતઃ પુરુત્રા શયે શયાસુ પ્રયુતો વનાનુ ।
અન્યા વત્સમ્ ભરતિ ક્ષેતિ માતા મહદ્ દેવાનામ્ અસુરત્વમ્ એકમ્ ॥

આક્ષિત્ પૂર્વાસ્વ્ અપરા અનૂરુત્ સદ્યો જાતાસુ તરુણીષ્વ્ અન્તઃ ।
અન્તર્વતીઃ સુવતે અપ્રવીતા મહદ્ દેવાનામ્ અસુરત્વમ્ એકમ્ ॥

શયુઃ પરસ્તાદ્ અધ નુ દ્વિમાતાબન્ધનશ્ ચરતિ વત્સ એકઃ ।
મિત્રસ્ય તા વરુણસ્ય વ્રતાનિ મહદ્ દેવાનામ્ અસુરત્વમ્ એકમ્ ॥

દ્વિમાતા હોતા વિદથેષુ સમ્રાળ્ અન્વ્ અગ્રં ચરતિ ક્ષેતિ બુધ્નઃ ।
પ્ર રણ્યાનિ રણ્યવાચો ભરન્તે મહદ્ દેવાનામ્ અસુરત્વમ્ એકમ્ ॥

શૂરસ્યેવ યુધ્યતો અન્તમસ્ય પ્રતીચીનં દદૃશે વિશ્વમ્ આયત્ ।
અન્તર્ મતિશ્ ચરતિ નિષ્ષિધં ગોર્ મહદ્ દેવાનામ્ અસુરત્વમ્ એકમ્ ॥

નિ વેવેતિ પલિતો દૂત આસ્વ્ અન્તર્ મહાઁશ્ ચરતિ રોચનેન ।
વપૂંષિ બિભ્રદ્ અભિ નો વિ ચષ્ટે મહદ્ દેવાનામ્ અસુરત્વમ્ એકમ્ ॥

વિષ્ણુર્ ગોપાઃ પરમમ્ પાતિ પાથઃ પ્રિયા ધામાન્ય્ અમૃતા દધાનઃ ।
અગ્નિષ્ ટા વિશ્વા ભુવનાનિ વેદ મહદ્ દેવાનામ્ અસુરત્વમ્ એકમ્ ॥

નાના ચક્રાતે યમ્યા3 વપૂંષિ તયોર્ અન્યદ્ રોચતે કૃષ્ણમ્ અન્યત્ ।
શ્યાવી ચ યદ્ અરુષી ચ સ્વસારૌ મહદ્ દેવાનામ્ અસુરત્વમ્ એકમ્ ॥

માતા ચ યત્ર દુહિતા ચ ધેનૂ સબર્દુઘે ધાપયેતે સમીચી ।
ઋતસ્ય તે સદસીળે અન્તર્ મહદ્ દેવાનામ્ અસુરત્વમ્ એકમ્ ॥

અન્યસ્યા વત્સં રિહતી મિમાય કયા ભુવા નિ દધે ધેનુર્ ઊધઃ ।
ઋતસ્ય સા પયસાપિન્વતેળા મહદ્ દેવાનામ્ અસુરત્વમ્ એકમ્ ॥

પદ્યા વસ્તે પુરુરૂપા વપૂંષ્ય્ ઊર્ધ્વા તસ્થૌ ત્ર્યવિં રેરિહાણા ।
ઋતસ્ય સદ્મ વિ ચરામિ વિદ્વાન્ મહદ્ દેવાનામ્ અસુરત્વમ્ એકમ્ ॥

પદે ઇવ નિહિતે દસ્મે અન્તસ્ તયોર્ અન્યદ્ ગુહ્યમ્ આવિર્ અન્યત્ ।
સધ્રીચીના પથ્યા3 સા વિષૂચી મહદ્ દેવાનામ્ અસુરત્વમ્ એકમ્ ॥

આ ધેનવો ધુનયન્તામ્ અશિશ્વીઃ સબર્દુઘાઃ શશયા અપ્રદુગ્ધાઃ ।
નવ્યા-નવ્યા યુવતયો ભવન્તીર્ મહદ્ દેવાનામ્ અસુરત્વમ્ એકમ્ ॥

યદ્ અન્યાસુ વૃષભો રોરવીતિ સો અન્યસ્મિન્ યૂથે નિ દધાતિ રેતઃ ।
સ હિ ક્ષપાવાન્ સ ભગઃ સ રાજા મહદ્ દેવાનામ્ અસુરત્વમ્ એકમ્ ॥

વીરસ્ય નુ સ્વશ્વ્યં જનાસઃ પ્ર નુ વોચામ વિદુર્ અસ્ય દેવાઃ ।
ષોળ્હા યુક્તાઃ પઞ્ચ-પઞ્ચા વહન્તિ મહદ્ દેવાનામ્ અસુરત્વમ્ એકમ્ ॥

દેવસ્ ત્વષ્ટા સવિતા વિશ્વરૂપઃ પુપોષ પ્રજાઃ પુરુધા જજાન ।
ઇમા ચ વિશ્વા ભુવનાન્ય્ અસ્ય મહદ્ દેવાનામ્ અસુરત્વમ્ એકમ્ ॥

મહી સમ્ ઐરચ્ ચમ્વા સમીચી ઉભે તે અસ્ય વસુના ન્યૃષ્ટે ।
શૃણ્વે વીરો વિન્દમાનો વસૂનિ મહદ્ દેવાનામ્ અસુરત્વમ્ એકમ્ ॥

ઇમાં ચ નઃ પૃથિવીં વિશ્વધાયા ઉપ ક્ષેતિ હિતમિત્રો ન રાજા ।
પુરઃસદઃ શર્મસદો ન વીરા મહદ્ દેવાનામ્ અસુરત્વમ્ એકમ્ ॥

નિષ્ષિધ્વરીસ્ ત ઓષધીર્ ઉતાપો રયિં ત ઇન્દ્ર પૃથિવી બિભર્તિ ।
સખાયસ્ તે વામભાજઃ સ્યામ મહદ્ દેવાનામ્ અસુરત્વમ્ એકમ્ ॥