ઋગ્વેદ · અધ્યાય 3.048

સદ્યો હ જાતો વૃષભઃ કનીનઃ પ્રભર્તુમ્ આવદ્ અન્ધસઃ સુતસ્ય ।
સાધોઃ પિબ પ્રતિકામં યથા તે રસાશિરઃ પ્રથમં સોમ્યસ્ય ॥

યજ્ જાયથાસ્ તદ્ અહર્ અસ્ય કામે ઽંશોઃ પીયૂષમ્ અપિબો ગિરિષ્ઠામ્ ।
તં તે માતા પરિ યોષા જનિત્રી મહઃ પિતુર્ દમ આસિઞ્ચદ્ અગ્રે ॥

ઉપસ્થાય માતરમ્ અન્નમ્ ઐટ્ટ તિગ્મમ્ અપશ્યદ્ અભિ સોમમ્ ઊધઃ ।
પ્રયાવયન્ન્ અચરદ્ ગૃત્સો અન્યાન્ મહાનિ ચક્રે પુરુધપ્રતીકઃ ॥

ઉગ્રસ્ તુરાષાળ્ અભિભૂત્યોજા યથાવશં તન્વં ચક્ર એષઃ ।
ત્વષ્ટારમ્ ઇન્દ્રો જનુષાભિભૂયામુષ્યા સોમમ્ અપિબચ્ ચમૂષુ ॥

શુનં હુવેમ મઘવાનમ્ ઇન્દ્રમ્ અસ્મિન્ ભરે નૃતમં વાજસાતૌ ।
શૃણ્વન્તમ્ ઉગ્રમ્ ઊતયે સમત્સુ ઘ્નન્તં વૃત્રાણિ સંજિતં ધનાનામ્ ॥