ઋગ્વેદ · અધ્યાય 3.044

અયં તે અસ્તુ હર્યતઃ સોમ આ હરિભિઃ સુતઃ ।
જુષાણ ઇન્દ્ર હરિભિર્ ન આ ગહ્ય્ આ તિષ્ઠ હરિતં રથમ્ ॥

હર્યન્ન્ ઉષસમ્ અર્ચયઃ સૂર્યં હર્યન્ન્ અરોચયઃ ।
વિદ્વાઁશ્ ચિકિત્વાન્ હર્યશ્વ વર્ધસ ઇન્દ્ર વિશ્વા અભિ શ્રિયઃ ॥

દ્યામ્ ઇન્દ્રો હરિધાયસમ્ પૃથિવીં હરિવર્પસમ્ ।
અધારયદ્ ધરિતોર્ ભૂરિ ભોજનં યયોર્ અન્તર્ હરિશ્ ચરત્ ॥

જજ્ઞાનો હરિતો વૃષા વિશ્વમ્ આ ભાતિ રોચનમ્ ।
હર્યશ્વો હરિતં ધત્ત આયુધમ્ આ વજ્રમ્ બાહ્વોર્ હરિમ્ ॥

ઇન્દ્રો હર્યન્તમ્ અર્જુનં વજ્રં શુક્રૈર્ અભીવૃતમ્ ।
અપાવૃણોદ્ ધરિભિર્ અદ્રિભિઃ સુતમ્ ઉદ્ ગા હરિભિર્ આજત ॥