ઋગ્વેદ · અધ્યાય 3.041

આ તૂ ન ઇન્દ્ર મદ્ર્યગ્ ઘુવાનઃ સોમપીતયે ।
હરિભ્યાં યાહ્ય્ અદ્રિવઃ ॥

સત્તો હોતા ન ઋત્વિયસ્ તિસ્તિરે બર્હિર્ આનુષક્ ।
અયુજ્રન્ પ્રાતર્ અદ્રયઃ ॥

ઇમા બ્રહ્મ બ્રહ્મવાહઃ ક્રિયન્ત આ બર્હિઃ સીદ ।
વીહિ શૂર પુરોળાશમ્ ॥

રારન્ધિ સવનેષુ ણ એષુ સ્તોમેષુ વૃત્રહન્ ।
ઉક્થેષ્વ્ ઇન્દ્ર ગિર્વણઃ ॥

મતયઃ સોમપામ્ ઉરું રિહન્તિ શવસસ્ પતિમ્ ।
ઇન્દ્રં વત્સં ન માતરઃ ॥

સ મન્દસ્વા હ્ય્ અન્ધસો રાધસે તન્વા મહે ।
ન સ્તોતારં નિદે કરઃ ॥

વયમ્ ઇન્દ્ર ત્વાયવો હવિષ્મન્તો જરામહે ।
ઉત ત્વમ્ અસ્મયુર્ વસો ॥

મારે અસ્મદ્ વિ મુમુચો હરિપ્રિયાર્વાઙ્ યાહિ ।
ઇન્દ્ર સ્વધાવો મત્સ્વેહ ॥

અર્વાઞ્ચં ત્વા સુખે રથે વહતામ્ ઇન્દ્ર કેશિના ।
ઘૃતસ્નૂ બર્હિર્ આસદે ॥