ઋગ્વેદ · અધ્યાય 3.035

તિષ્ઠા હરી રથ આ યુજ્યમાના યાહિ વાયુર્ ન નિયુતો નો અચ્છ ।
પિબાસ્ય્ અન્ધો અભિસૃષ્ટો અસ્મે ઇન્દ્ર સ્વાહા રરિમા તે મદાય ॥

ઉપાજિરા પુરુહૂતાય સપ્તી હરી રથસ્ય ધૂર્ષ્વ્ આ યુનજ્મિ ।
દ્રવદ્ યથા સમ્ભૃતં વિશ્વતશ્ ચિદ્ ઉપેમં યજ્ઞમ્ આ વહાત ઇન્દ્રમ્ ॥

ઉપો નયસ્વ વૃષણા તપુષ્પોતેમ્ અવ ત્વં વૃષભ સ્વધાવઃ ।
ગ્રસેતામ્ અશ્વા વિ મુચેહ શોણા દિવે-દિવે સદૃશીર્ અદ્ધિ ધાનાઃ ॥

બ્રહ્મણા તે બ્રહ્મયુજા યુનજ્મિ હરી સખાયા સધમાદ આશૂ ।
સ્થિરં રથં સુખમ્ ઇન્દ્રાધિતિષ્ઠન્ પ્રજાનન્ વિદ્વાઁ ઉપ યાહિ સોમમ્ ॥

મા તે હરી વૃષણા વીતપૃષ્ઠા નિ રીરમન્ યજમાનાસો અન્યે ।
અત્યાયાહિ શશ્વતો વયં તે ઽરં સુતેભિઃ કૃણવામ સોમૈઃ ॥

તવાયં સોમસ્ ત્વમ્ એહ્ય્ અર્વાઙ્ છશ્વત્તમં સુમના અસ્ય પાહિ ।
અસ્મિન્ યજ્ઞે બર્હિષ્ય્ આ નિષદ્યા દધિષ્વેમં જઠર ઇન્દુમ્ ઇન્દ્ર ॥

સ્તીર્ણં તે બર્હિઃ સુત ઇન્દ્ર સોમઃ કૃતા ધાના અત્તવે તે હરિભ્યામ્ ।
તદોકસે પુરુશાકાય વૃષ્ણે મરુત્વતે તુભ્યં રાતા હવીંષિ ॥

ઇમં નરઃ પર્વતાસ્ તુભ્યમ્ આપઃ સમ્ ઇન્દ્ર ગોભિર્ મધુમન્તમ્ અક્રન્ ।
તસ્યાગત્યા સુમના ઋષ્વ પાહિ પ્રજાનન્ વિદ્વાન્ પથ્યા3 અનુ સ્વાઃ ॥

યાઁ આભજો મરુત ઇન્દ્ર સોમે યે ત્વામ્ અવર્ધન્ન્ અભવન્ ગણસ્ તે ।
તેભિર્ એતં સજોષા વાવશાનો3 ઽગ્નેઃ પિબ જિહ્વયા સોમમ્ ઇન્દ્ર ॥

ઇન્દ્ર પિબ સ્વધયા ચિત્ સુતસ્યાગ્નેર્ વા પાહિ જિહ્વયા યજત્ર ।
અધ્વર્યોર્ વા પ્રયતં શક્ર હસ્તાદ્ ધોતુર્ વા યજ્ઞં હવિષો જુષસ્વ ॥

શુનં હુવેમ મઘવાનમ્ ઇન્દ્રમ્ અસ્મિન્ ભરે નૃતમં વાજસાતૌ ।
શૃણ્વન્તમ્ ઉગ્રમ્ ઊતયે સમત્સુ ઘ્નન્તં વૃત્રાણિ સંજિતં ધનાનામ્ ॥