ઋગ્વેદ · અધ્યાય 3.032

ઇન્દ્ર સોમં સોમપતે પિબેમમ્ માધ્યંદિનં સવનં ચારુ યત્ તે ।
પ્રપ્રુથ્યા શિપ્રે મઘવન્ન્ ઋજીષિન્ વિમુચ્યા હરી ઇહ માદયસ્વ ॥

ગવાશિરમ્ મન્થિનમ્ ઇન્દ્ર શુક્રમ્ પિબા સોમં રરિમા તે મદાય ।
બ્રહ્મકૃતા મારુતેના ગણેન સજોષા રુદ્રૈસ્ તૃપદ્ આ વૃષસ્વ ॥

યે તે શુષ્મં યે તવિષીમ્ અવર્ધન્ન્ અર્ચન્ત ઇન્દ્ર મરુતસ્ ત ઓજઃ ।
માધ્યંદિને સવને વજ્રહસ્ત પિબા રુદ્રેભિઃ સગણઃ સુશિપ્ર ॥

ત ઇન્ ન્વ્ અસ્ય મધુમદ્ વિવિપ્ર ઇન્દ્રસ્ય શર્ધો મરુતો ય આસન્ ।
યેભિર્ વૃત્રસ્યેષિતો વિવેદામર્મણો મન્યમાનસ્ય મર્મ ॥

મનુષ્વદ્ ઇન્દ્ર સવનં જુષાણઃ પિબા સોમં શશ્વતે વીર્યાય ।
સ આ વવૃત્સ્વ હર્યશ્વ યજ્ઞૈઃ સરણ્યુભિર્ અપો અર્ણા સિસર્ષિ ॥

ત્વમ્ અપો યદ્ ધ વૃત્રં જઘન્વાઁ અત્યાઁ ઇવ પ્રાસૃજઃ સર્તવાજૌ ।
શયાનમ્ ઇન્દ્ર ચરતા વધેન વવ્રિવાંસમ્ પરિ દેવીર્ અદેવમ્ ॥

યજામ ઇન્ નમસા વૃદ્ધમ્ ઇન્દ્રમ્ બૃહન્તમ્ ઋષ્વમ્ અજરં યુવાનમ્ ।
યસ્ય પ્રિયે મમતુર્ યજ્ઞિયસ્ય ન રોદસી મહિમાનમ્ મમાતે ॥

ઇન્દ્રસ્ય કર્મ સુકૃતા પુરૂણિ વ્રતાનિ દેવા ન મિનન્તિ વિશ્વે ।
દાધાર યઃ પૃથિવીં દ્યામ્ ઉતેમાં જજાન સૂર્યમ્ ઉષસં સુદંસાઃ ॥

અદ્રોઘ સત્યં તવ તન્ મહિત્વં સદ્યો યજ્ જાતો અપિબો હ સોમમ્ ।
ન દ્યાવ ઇન્દ્ર તવસસ્ ત ઓજો નાહા ન માસાઃ શરદો વરન્ત ॥

ત્વં સદ્યો અપિબો જાત ઇન્દ્ર મદાય સોમમ્ પરમે વ્યોમન્ ।
યદ્ ધ દ્યાવાપૃથિવી આવિવેશીર્ અથાભવઃ પૂર્વ્યઃ કારુધાયાઃ ॥

અહન્ન્ અહિમ્ પરિશયાનમ્ અર્ણ ઓજાયમાનં તુવિજાત તવ્યાન્ ।
ન તે મહિત્વમ્ અનુ ભૂદ્ અધ દ્યૌર્ યદ્ અન્યયા સ્ફિગ્યા3 ક્ષામ્ અવસ્થાઃ ॥

યજ્ઞો હિ ત ઇન્દ્ર વર્ધનો ભૂદ્ ઉત પ્રિયઃ સુતસોમો મિયેધઃ ।
યજ્ઞેન યજ્ઞમ્ અવ યજ્ઞિયઃ સન્ યજ્ઞસ્ તે વજ્રમ્ અહિહત્ય આવત્ ॥

યજ્ઞેનેન્દ્રમ્ અવસા ચક્રે અર્વાગ્ ઐનં સુમ્નાય નવ્યસે વવૃત્યામ્ ।
યઃ સ્તોમેભિર્ વાવૃધે પૂર્વ્યેભિર્ યો મધ્યમેભિર્ ઉત નૂતનેભિઃ ॥

વિવેષ યન્ મા ધિષણા જજાન સ્તવૈ પુરા પાર્યાદ્ ઇન્દ્રમ્ અહ્નઃ ।
અંહસો યત્ર પીપરદ્ યથા નો નાવેવ યાન્તમ્ ઉભયે હવન્તે ॥

આપૂર્ણો અસ્ય કલશઃ સ્વાહા સેક્તેવ કોશં સિસિચે પિબધ્યૈ ।
સમ્ ઉ પ્રિયા આવવૃત્રન્ મદાય પ્રદક્ષિણિદ્ અભિ સોમાસ ઇન્દ્રમ્ ॥

ન ત્વા ગભીરઃ પુરુહૂત સિન્ધુર્ નાદ્રયઃ પરિ ષન્તો વરન્ત ।
ઇત્થા સખિભ્ય ઇષિતો યદ્ ઇન્દ્રા દૃળ્હં ચિદ્ અરુજો ગવ્યમ્ ઊર્વમ્ ॥

શુનં હુવેમ મઘવાનમ્ ઇન્દ્રમ્ અસ્મિન્ ભરે નૃતમં વાજસાતૌ ।
શૃણ્વન્તમ્ ઉગ્રમ્ ઊતયે સમત્સુ ઘ્નન્તં વૃત્રાણિ સંજિતં ધનાનામ્ ॥