ઋગ્વેદ · અધ્યાય 3.029

અસ્તીદમ્ અધિમન્થનમ્ અસ્તિ પ્રજનનં કૃતમ્ ।
એતાં વિશ્પત્નીમ્ આ ભરાગ્નિમ્ મન્થામ પૂર્વથા ॥

અરણ્યોર્ નિહિતો જાતવેદા ગર્ભ ઇવ સુધિતો ગર્ભિણીષુ ।
દિવે-દિવ ઈડ્યો જાગૃવદ્ભિર્ હવિષ્મદ્ભિર્ મનુષ્યેભિર્ અગ્નિઃ ॥

ઉત્તાનાયામ્ અવ ભરા ચિકિત્વાન્ સદ્યઃ પ્રવીતા વૃષણં જજાન ।
અરુષસ્તૂપો રુશદ્ અસ્ય પાજ ઇળાયાસ્ પુત્રો વયુને ઽજનિષ્ટ ॥

ઇળાયાસ્ ત્વા પદે વયં નાભા પૃથિવ્યા અધિ ।
જાતવેદો નિ ધીમહ્ય્ અગ્ને હવ્યાય વોળ્હવે ॥

મન્થતા નરઃ કવિમ્ અદ્વયન્તમ્ પ્રચેતસમ્ અમૃતં સુપ્રતીકમ્ ।
યજ્ઞસ્ય કેતુમ્ પ્રથમમ્ પુરસ્તાદ્ અગ્નિં નરો જનયતા સુશેવમ્ ॥

યદી મન્થન્તિ બાહુભિર્ વિ રોચતે ઽશ્વો ન વાજ્ય્ અરુષો વનેષ્વ્ આ ।
ચિત્રો ન યામન્ન્ અશ્વિનોર્ અનિવૃતઃ પરિ વૃણક્ત્ય્ અશ્મનસ્ તૃણા દહન્ ॥

જાતો અગ્ની રોચતે ચેકિતાનો વાજી વિપ્રઃ કવિશસ્તઃ સુદાનુઃ ।
યં દેવાસ ઈડ્યં વિશ્વવિદં હવ્યવાહમ્ અદધુર્ અધ્વરેષુ ॥

સીદ હોતઃ સ્વ ઉ લોકે ચિકિત્વાન્ સાદયા યજ્ઞં સુકૃતસ્ય યોનૌ ।
દેવાવીર્ દેવાન્ હવિષા યજાસ્ય્ અગ્ને બૃહદ્ યજમાને વયો ધાઃ ॥

કૃણોત ધૂમં વૃષણં સખાયો ઽસ્રેધન્ત ઇતન વાજમ્ અચ્છ ।
અયમ્ અગ્નિઃ પૃતનાષાટ્ સુવીરો યેન દેવાસો અસહન્ત દસ્યૂન્ ॥

અયં તે યોનિર્ ઋત્વિયો યતો જાતો અરોચથાઃ ।
તં જાનન્ન્ અગ્ન આ સીદાથા નો વર્ધયા ગિરઃ ॥

તનૂનપાદ્ ઉચ્યતે ગર્ભ આસુરો નરાશંસો ભવતિ યદ્ વિજાયતે ।
માતરિશ્વા યદ્ અમિમીત માતરિ વાતસ્ય સર્ગો અભવત્ સરીમણિ ॥

સુનિર્મથા નિર્મથિતઃ સુનિધા નિહિતઃ કવિઃ ।
અગ્ને સ્વધ્વરા કૃણુ દેવાન્ દેવયતે યજ ॥

અજીજનન્ન્ અમૃતમ્ મર્ત્યાસો ઽસ્રેમાણં તરણિં વીળુજમ્ભમ્ ।
દશ સ્વસારો અગ્રુવઃ સમીચીઃ પુમાંસં જાતમ્ અભિ સં રભન્તે ॥

પ્ર સપ્તહોતા સનકાદ્ અરોચત માતુર્ ઉપસ્થે યદ્ અશોચદ્ ઊધનિ ।
ન નિ મિષતિ સુરણો દિવે-દિવે યદ્ અસુરસ્ય જઠરાદ્ અજાયત ॥

અમિત્રાયુધો મરુતામ્ ઇવ પ્રયાઃ પ્રથમજા બ્રહ્મણો વિશ્વમ્ ઇદ્ વિદુઃ ।
દ્યુમ્નવદ્ બ્રહ્મ કુશિકાસ એરિર એક-એકો દમે અગ્નિં સમ્ ઈધિરે ॥

યદ્ અદ્ય ત્વા પ્રયતિ યજ્ઞે અસ્મિન્ હોતશ્ ચિકિત્વો ઽવૃણીમહીહ ।
ધ્રુવમ્ અયા ધ્રુવમ્ ઉતાશમિષ્ઠાઃ પ્રજાનન્ વિદ્વાઁ ઉપ યાહિ સોમમ્ ॥