ઋગ્વેદ · અધ્યાય 2.025

ઇન્ધાનો અગ્નિં વનવદ્ વનુષ્યતઃ કૃતબ્રહ્મા શૂશુવદ્ રાતહવ્ય ઇત્ ।
જાતેન જાતમ્ અતિ સ પ્ર સર્સૃતે યં-યં યુજં કૃણુતે બ્રહ્મણસ્ પતિઃ ॥

વીરેભિર્ વીરાન્ વનવદ્ વનુષ્યતો ગોભી રયિમ્ પપ્રથદ્ બોધતિ ત્મના ।
તોકં ચ તસ્ય તનયં ચ વર્ધતે યં-યં યુજં કૃણુતે બ્રહ્મણસ્ પતિઃ ॥

સિન્ધુર્ ન ક્ષોદઃ શિમીવાઁ ઋઘાયતો વૃષેવ વધ્રીઁર્ અભિ વષ્ટ્ય્ ઓજસા ।
અગ્નેર્ ઇવ પ્રસિતિર્ નાહ વર્તવે યં-યં યુજં કૃણુતે બ્રહ્મણસ્ પતિઃ ॥

તસ્મા અર્ષન્તિ દિવ્યા અસશ્ચતઃ સ સત્વભિઃ પ્રથમો ગોષુ ગચ્છતિ ।
અનિભૃષ્ટતવિષિર્ હન્ત્ય્ ઓજસા યં-યં યુજં કૃણુતે બ્રહ્મણસ્ પતિઃ ॥

તસ્મા ઇદ્ વિશ્વે ધુનયન્ત સિન્ધવો ઽચ્છિદ્રા શર્મ દધિરે પુરૂણિ ।
દેવાનાં સુમ્ને સુભગઃ સ એધતે યં-યં યુજં કૃણુતે બ્રહ્મણસ્ પતિઃ ॥