ઋગ્વેદ · અધ્યાય 2.016

પ્ર વઃ સતાં જ્યેષ્ઠતમાય સુષ્ટુતિમ્ અગ્નાવ્ ઇવ સમિધાને હવિર્ ભરે ।
ઇન્દ્રમ્ અજુર્યં જરયન્તમ્ ઉક્ષિતં સનાદ્ યુવાનમ્ અવસે હવામહે ॥

યસ્માદ્ ઇન્દ્રાદ્ બૃહતઃ કિં ચનેમ્ ઋતે વિશ્વાન્ય્ અસ્મિન્ સમ્ભૃતાધિ વીર્યા ।
જઠરે સોમં તન્વી3 સહો મહો હસ્તે વજ્રમ્ ભરતિ શીર્ષણિ ક્રતુમ્ ॥

ન ક્ષોણીભ્યામ્ પરિભ્વે ત ઇન્દ્રિયં ન સમુદ્રૈઃ પર્વતૈર્ ઇન્દ્ર તે રથઃ ।
ન તે વજ્રમ્ અન્વ્ અશ્નોતિ કશ્ ચન યદ્ આશુભિઃ પતસિ યોજના પુરુ ॥

વિશ્વે હ્ય્ અસ્મૈ યજતાય ધૃષ્ણવે ક્રતુમ્ ભરન્તિ વૃષભાય સશ્ચતે ।
વૃષા યજસ્વ હવિષા વિદુષ્ટરઃ પિબેન્દ્ર સોમં વૃષભેણ ભાનુના ॥

વૃષ્ણઃ કોશઃ પવતે મધ્વ ઊર્મિર્ વૃષભાન્નાય વૃષભાય પાતવે ।
વૃષણાધ્વર્યૂ વૃષભાસો અદ્રયો વૃષણં સોમં વૃષભાય સુષ્વતિ ॥

વૃષા તે વજ્ર ઉત તે વૃષા રથો વૃષણા હરી વૃષભાણ્ય્ આયુધા ।
વૃષ્ણો મદસ્ય વૃષભ ત્વમ્ ઈશિષ ઇન્દ્ર સોમસ્ય વૃષભસ્ય તૃપ્ણુહિ ॥

પ્ર તે નાવં ન સમને વચસ્યુવમ્ બ્રહ્મણા યામિ સવનેષુ દાધૃષિઃ ।
કુવિન્ નો અસ્ય વચસો નિબોધિષદ્ ઇન્દ્રમ્ ઉત્સં ન વસુનઃ સિચામહે ॥

પુરા સમ્બાધાદ્ અભ્ય્ આ વવૃત્સ્વ નો ધેનુર્ ન વત્સં યવસસ્ય પિપ્યુષી ।
સકૃત્ સુ તે સુમતિભિઃ શતક્રતો સમ્ પત્નીભિર્ ન વૃષણો નસીમહિ ॥

નૂનં સા તે પ્રતિ વરં જરિત્રે દુહીયદ્ ઇન્દ્ર દક્ષિણા મઘોની ।
શિક્ષા સ્તોતૃભ્યો માતિ ધગ્ ભગો નો બૃહદ્ વદેમ વિદથે સુવીરાઃ ॥