ઋગ્વેદ · અધ્યાય 2.012

યો જાત એવ પ્રથમો મનસ્વાન્ દેવો દેવાન્ ક્રતુના પર્યભૂષત્ ।
યસ્ય શુષ્માદ્ રોદસી અભ્યસેતાં નૃમ્ણસ્ય મહ્ના સ જનાસ ઇન્દ્રઃ ॥

યઃ પૃથિવીં વ્યથમાનામ્ અદૃંહદ્ યઃ પર્વતાન્ પ્રકુપિતાઁ અરમ્ણાત્ ।
યો અન્તરિક્ષં વિમમે વરીયો યો દ્યામ્ અસ્તભ્નાત્ સ જનાસ ઇન્દ્રઃ ॥

યો હત્વાહિમ્ અરિણાત્ સપ્ત સિન્ધૂન્ યો ગા ઉદાજદ્ અપધા વલસ્ય ।
યો અશ્મનોર્ અન્તર્ અગ્નિં જજાન સંવૃક્ સમત્સુ સ જનાસ ઇન્દ્રઃ ॥

યેનેમા વિશ્વા ચ્યવના કૃતાનિ યો દાસં વર્ણમ્ અધરં ગુહાકઃ ।
શ્વઘ્નીવ યો જિગીવાઁલ્ લક્ષમ્ આદદ્ અર્યઃ પુષ્ટાનિ સ જનાસ ઇન્દ્રઃ ॥

યં સ્મા પૃચ્છન્તિ કુહ સેતિ ઘોરમ્ ઉતેમ્ આહુર્ નૈષો અસ્તીત્ય્ એનમ્ ।
સો અર્યઃ પુષ્ટીર્ વિજ ઇવા મિનાતિ શ્રદ્ અસ્મૈ ધત્ત સ જનાસ ઇન્દ્રઃ ॥

યો રધ્રસ્ય ચોદિતા યઃ કૃશસ્ય યો બ્રહ્મણો નાધમાનસ્ય કીરેઃ ।
યુક્તગ્રાવ્ણો યો ઽવિતા સુશિપ્રઃ સુતસોમસ્ય સ જનાસ ઇન્દ્રઃ ॥

યસ્યાશ્વાસઃ પ્રદિશિ યસ્ય ગાવો યસ્ય ગ્રામા યસ્ય વિશ્વે રથાસઃ ।
યઃ સૂર્યં ય ઉષસં જજાન યો અપાં નેતા સ જનાસ ઇન્દ્રઃ ॥

યં ક્રન્દસી સંયતી વિહ્વયેતે પરે ઽવર ઉભયા અમિત્રાઃ ।
સમાનં ચિદ્ રથમ્ આતસ્થિવાંસા નાના હવેતે સ જનાસ ઇન્દ્રઃ ॥

યસ્માન્ ન ઋતે વિજયન્તે જનાસો યં યુધ્યમાના અવસે હવન્તે ।
યો વિશ્વસ્ય પ્રતિમાનમ્ બભૂવ યો અચ્યુતચ્યુત્ સ જનાસ ઇન્દ્રઃ ॥

યઃ શશ્વતો મહ્ય્ એનો દધાનાન્ અમન્યમાનાઞ્ છર્વા જઘાન ।
યઃ શર્ધતે નાનુદદાતિ શૃધ્યાં યો દસ્યોર્ હન્તા સ જનાસ ઇન્દ્રઃ ॥

યઃ શમ્બરમ્ પર્વતેષુ ક્ષિયન્તં ચત્વારિંશ્યાં શરદ્ય્ અન્વવિન્દત્ ।
ઓજાયમાનં યો અહિં જઘાન દાનું શયાનં સ જનાસ ઇન્દ્રઃ ॥

યઃ સપ્તરશ્મિર્ વૃષભસ્ તુવિષ્માન્ અવાસૃજત્ સર્તવે સપ્ત સિન્ધૂન્ ।
યો રૌહિણમ્ અસ્ફુરદ્ વજ્રબાહુર્ દ્યામ્ આરોહન્તં સ જનાસ ઇન્દ્રઃ ॥

દ્યાવા ચિદ્ અસ્મૈ પૃથિવી નમેતે શુષ્માચ્ ચિદ્ અસ્ય પર્વતા ભયન્તે ।
યઃ સોમપા નિચિતો વજ્રબાહુર્ યો વજ્રહસ્તઃ સ જનાસ ઇન્દ્રઃ ॥

યઃ સુન્વન્તમ્ અવતિ યઃ પચન્તં યઃ શંસન્તં યઃ શશમાનમ્ ઊતી ।
યસ્ય બ્રહ્મ વર્ધનં યસ્ય સોમો યસ્યેદં રાધઃ સ જનાસ ઇન્દ્રઃ ॥

યઃ સુન્વતે પચતે દુધ્ર આ ચિદ્ વાજં દર્દર્ષિ સ કિલાસિ સત્યઃ ।
વયં ત ઇન્દ્ર વિશ્વહ પ્રિયાસઃ સુવીરાસો વિદથમ્ આ વદેમ ॥