ઋગ્વેદ · અધ્યાય 10.121

હિરણ્યગર્ભઃ સમ્ અવર્તતાગ્રે ભૂતસ્ય જાતઃ પતિર્ એક આસીત્ ।
સ દાધાર પૃથિવીં દ્યામ્ ઉતેમાં કસ્મૈ દેવાય હવિષા વિધેમ ॥

ય આત્મદા બલદા યસ્ય વિશ્વ ઉપાસતે પ્રશિષં યસ્ય દેવાઃ ।
યસ્ય છાયામૃતં યસ્ય મૃત્યુઃ કસ્મૈ દેવાય હવિષા વિધેમ ॥

યઃ પ્રાણતો નિમિષતો મહિત્વૈક ઇદ્ રાજા જગતો બભૂવ ।
ય ઈશે અસ્ય દ્વિપદશ્ ચતુષ્પદઃ કસ્મૈ દેવાય હવિષા વિધેમ ॥

યસ્યેમે હિમવન્તો મહિત્વા યસ્ય સમુદ્રં રસયા સહાહુઃ ।
યસ્યેમાઃ પ્રદિશો યસ્ય બાહૂ કસ્મૈ દેવાય હવિષા વિધેમ ॥

યેન દ્યૌર્ ઉગ્રા પૃથિવી ચ દૃળ્હા યેન સ્વઃ સ્તભિતં યેન નાકઃ ।
યો અન્તરિક્ષે રજસો વિમાનઃ કસ્મૈ દેવાય હવિષા વિધેમ ॥

યં ક્રન્દસી અવસા તસ્તભાને અભ્ય્ ઐક્ષેતામ્ મનસા રેજમાને ।
યત્રાધિ સૂર ઉદિતો વિભાતિ કસ્મૈ દેવાય હવિષા વિધેમ ॥

આપો હ યદ્ બૃહતીર્ વિશ્વમ્ આયન્ ગર્ભં દધાના જનયન્તીર્ અગ્નિમ્ ।
તતો દેવાનાં સમ્ અવર્તતાસુર્ એકઃ કસ્મૈ દેવાય હવિષા વિધેમ ॥

યશ્ ચિદ્ આપો મહિના પર્યપશ્યદ્ દક્ષં દધાના જનયન્તીર્ યજ્ઞમ્ ।
યો દેવેષ્વ્ અધિ દેવ એક આસીત્ કસ્મૈ દેવાય હવિષા વિધેમ ॥

મા નો હિંસીજ્ જનિતા યઃ પૃથિવ્યા યો વા દિવં સત્યધર્મા જજાન ।
યશ્ ચાપશ્ ચન્દ્રા બૃહતીર્ જજાન કસ્મૈ દેવાય હવિષા વિધેમ ॥

પ્રજાપતે ન ત્વદ્ એતાન્ય્ અન્યો વિશ્વા જાતાનિ પરિ તા બભૂવ ।
યત્કામાસ્ તે જુહુમસ્ તન્ નો અસ્તુ વયં સ્યામ પતયો રયીણામ્ ॥