ઋગ્વેદ · અધ્યાય 10.108

કિમ્ ઇચ્છન્તી સરમા પ્રેદમ્ આનડ્ દૂરે હ્ય્ અધ્વા જગુરિઃ પરાચૈઃ ।
કાસ્મેહિતિઃ કા પરિતક્મ્યાસીત્ કથં રસાયા અતરઃ પયાંસિ ॥

ઇન્દ્રસ્ય દૂતીર્ ઇષિતા ચરામિ મહ ઇચ્છન્તી પણયો નિધીન્ વઃ ।
અતિષ્કદો ભિયસા તન્ ન આવત્ તથા રસાયા અતરમ્ પયાંસિ ॥

કીદૃઙ્ઙ્ ઇન્દ્રઃ સરમે કા દૃશીકા યસ્યેદં દૂતીર્ અસરઃ પરાકાત્ ।
આ ચ ગચ્છાન્ મિત્રમ્ એના દધામાથા ગવાં ગોપતિર્ નો ભવાતિ ॥

નાહં તં વેદ દભ્યં દભત્ સ યસ્યેદં દૂતીર્ અસરમ્ પરાકાત્ ।
ન તં ગૂહન્તિ સ્રવતો ગભીરા હતા ઇન્દ્રેણ પણયઃ શયધ્વે ॥

ઇમા ગાવઃ સરમે યા ઐચ્છઃ પરિ દિવો અન્તાન્ સુભગે પતન્તી ।
કસ્ ત એના અવ સૃજાદ્ અયુધ્વ્ય્ ઉતાસ્માકમ્ આયુધા સન્તિ તિગ્મા ॥

અસેન્યા વઃ પણયો વચાંસ્ય્ અનિષવ્યાસ્ તન્વઃ સન્તુ પાપીઃ ।
અધૃષ્ટો વ એતવા અસ્તુ પન્થા બૃહસ્પતિર્ વ ઉભયા ન મૃળાત્ ॥

અયં નિધિઃ સરમે અદ્રિબુધ્નો ગોભિર્ અશ્વેભિર્ વસુભિર્ ન્યૃષ્ટઃ ।
રક્ષન્તિ તમ્ પણયો યે સુગોપા રેકુ પદમ્ અલકમ્ આ જગન્થ ॥

એહ ગમન્ન્ ઋષયઃ સોમશિતા અયાસ્યો અઙ્ગિરસો નવગ્વાઃ ।
ત એતમ્ ઊર્વં વિ ભજન્ત ગોનામ્ અથૈતદ્ વચઃ પણયો વમન્ન્ ઇત્ ॥

એવા ચ ત્વં સરમ આજગન્થ પ્રબાધિતા સહસા દૈવ્યેન ।
સ્વસારં ત્વા કૃણવૈ મા પુનર્ ગા અપ તે ગવાં સુભગે ભજામ ॥

નાહં વેદ ભ્રાતૃત્વં નો સ્વસૃત્વમ્ ઇન્દ્રો વિદુર્ અઙ્ગિરસશ્ ચ ઘોરાઃ ।
ગોકામા મે અચ્છદયન્ યદ્ આયમ્ અપાત ઇત પણયો વરીયઃ ॥

દૂરમ્ ઇત પણયો વરીય ઉદ્ ગાવો યન્તુ મિનતીર્ ઋતેન ।
બૃહસ્પતિર્ યા અવિન્દન્ નિગૂળ્હાઃ સોમો ગ્રાવાણ ઋષયશ્ ચ વિપ્રાઃ ॥