ઋગ્વેદ · અધ્યાય 10.104

અસાવિ સોમઃ પુરુહૂત તુભ્યં હરિભ્યાં યજ્ઞમ્ ઉપ યાહિ તૂયમ્ ।
તુભ્યં ગિરો વિપ્રવીરા ઇયાના દધન્વિર ઇન્દ્ર પિબા સુતસ્ય ॥

અપ્સુ ધૂતસ્ય હરિવઃ પિબેહ નૃભિઃ સુતસ્ય જઠરમ્ પૃણસ્વ ।
મિમિક્ષુર્ યમ્ અદ્રય ઇન્દ્ર તુભ્યં તેભિર્ વર્ધસ્વ મદમ્ ઉક્થવાહઃ ॥

પ્રોગ્રામ્ પીતિં વૃષ્ણ ઇયર્મિ સત્યામ્ પ્રયૈ સુતસ્ય હર્યશ્વ તુભ્યમ્ ।
ઇન્દ્ર ધેનાભિર્ ઇહ માદયસ્વ ધીભિર્ વિશ્વાભિઃ શચ્યા ગૃણાનઃ ॥

ઊતી શચીવસ્ તવ વીર્યેણ વયો દધાના ઉશિજ ઋતજ્ઞાઃ ।
પ્રજાવદ્ ઇન્દ્ર મનુષો દુરોણે તસ્થુર્ ગૃણન્તઃ સધમાદ્યાસઃ ॥

પ્રણીતિભિષ્ ટે હર્યશ્વ સુષ્ટોઃ સુષુમ્નસ્ય પુરુરુચો જનાસઃ ।
મંહિષ્ઠામ્ ઊતિં વિતિરે દધાનાઃ સ્તોતાર ઇન્દ્ર તવ સૂનૃતાભિઃ ॥

ઉપ બ્રહ્માણિ હરિવો હરિભ્યાં સોમસ્ય યાહિ પીતયે સુતસ્ય ।
ઇન્દ્ર ત્વા યજ્ઞઃ ક્ષમમાણમ્ આનડ્ દાશ્વાઁ અસ્ય્ અધ્વરસ્ય પ્રકેતઃ ॥

સહસ્રવાજમ્ અભિમાતિષાહં સુતેરણમ્ મઘવાનં સુવૃક્તિમ્ ।
ઉપ ભૂષન્તિ ગિરો અપ્રતીતમ્ ઇન્દ્રં નમસ્યા જરિતુઃ પનન્ત ॥

સપ્તાપો દેવીઃ સુરણા અમૃક્તા યાભિઃ સિન્ધુમ્ અતર ઇન્દ્ર પૂર્ભિત્ ।
નવતિં સ્રોત્યા નવ ચ સ્રવન્તીર્ દેવેભ્યો ગાતુમ્ મનુષે ચ વિન્દઃ ॥

અપો મહીર્ અભિશસ્તેર્ અમુઞ્ચો ઽજાગર્ આસ્વ્ અધિ દેવ એકઃ ।
ઇન્દ્ર યાસ્ ત્વં વૃત્રતૂર્યે ચકર્થ તાભિર્ વિશ્વાયુસ્ તન્વમ્ પુપુષ્યાઃ ॥

વીરેણ્યઃ ક્રતુર્ ઇન્દ્રઃ સુશસ્તિર્ ઉતાપિ ધેના પુરુહૂતમ્ ઈટ્ટે ।
આર્દયદ્ વૃત્રમ્ અકૃણોદ્ ઉ લોકં સસાહે શક્રઃ પૃતના અભિષ્ટિઃ ॥

શુનં હુવેમ મઘવાનમ્ ઇન્દ્રમ્ અસ્મિન્ ભરે નૃતમં વાજસાતૌ ।
શૃણ્વન્તમ્ ઉગ્રમ્ ઊતયે સમત્સુ ઘ્નન્તં વૃત્રાણિ સંજિતં ધનાનામ્ ॥