ઋગ્વેદ · અધ્યાય 10.073

જનિષ્ઠા ઉગ્રઃ સહસે તુરાય મન્દ્ર ઓજિષ્ઠો બહુલાભિમાનઃ ।
અવર્ધન્ન્ ઇન્દ્રમ્ મરુતશ્ ચિદ્ અત્ર માતા યદ્ વીરં દધનદ્ ધનિષ્ઠા ॥

દ્રુહો નિષત્તા પૃશની ચિદ્ એવૈઃ પુરૂ શંસેન વાવૃધુષ્ ટ ઇન્દ્રમ્ ।
અભીવૃતેવ તા મહાપદેન ધ્વાન્તાત્ પ્રપિત્વાદ્ ઉદ્ અરન્ત ગર્ભાઃ ॥

ઋષ્વા તે પાદા પ્ર યજ્ જિગાસ્ય્ અવર્ધન્ વાજા ઉત યે ચિદ્ અત્ર ।
ત્વમ્ ઇન્દ્ર સાલાવૃકાન્ સહસ્રમ્ આસન્ દધિષે અશ્વિના વવૃત્યાઃ ॥

સમના તૂર્ણિર્ ઉપ યાસિ યજ્ઞમ્ આ નાસત્યા સખ્યાય વક્ષિ ।
વસાવ્યામ્ ઇન્દ્ર ધારયઃ સહસ્રાશ્વિના શૂર દદતુર્ મઘાનિ ॥

મન્દમાન ઋતાદ્ અધિ પ્રજાયૈ સખિભિર્ ઇન્દ્ર ઇષિરેભિર્ અર્થમ્ ।
આભિર્ હિ માયા ઉપ દસ્યુમ્ આગાન્ મિહઃ પ્ર તમ્રા અવપત્ તમાંસિ ॥

સનામાના ચિદ્ ધ્વસયો ન્ય્ અસ્મા અવાહન્ન્ ઇન્દ્ર ઉષસો યથાનઃ ।
ઋષ્વૈર્ અગચ્છઃ સખિભિર્ નિકામૈઃ સાકમ્ પ્રતિષ્ઠા હૃદ્યા જઘન્થ ॥

ત્વં જઘન્થ નમુચિમ્ મખસ્યું દાસં કૃણ્વાન ઋષયે વિમાયમ્ ।
ત્વં ચકર્થ મનવે સ્યોનાન્ પથો દેવત્રાઞ્જસેવ યાનાન્ ॥

ત્વમ્ એતાનિ પપ્રિષે વિ નામેશાન ઇન્દ્ર દધિષે ગભસ્તૌ ।
અનુ ત્વા દેવાઃ શવસા મદન્ત્ય્ ઉપરિબુધ્નાન્ વનિનશ્ ચકર્થ ॥

ચક્રં યદ્ અસ્યાપ્સ્વ્ આ નિષત્તમ્ ઉતો તદ્ અસ્મૈ મધ્વ્ ઇચ્ ચચ્છદ્યાત્ ।
પૃથિવ્યામ્ અતિષિતં યદ્ ઊધઃ પયો ગોષ્વ્ અદધા ઓષધીષુ ॥

અશ્વાદ્ ઇયાયેતિ યદ્ વદન્ત્ય્ ઓજસો જાતમ્ ઉત મન્ય એનમ્ ।
મન્યોર્ ઇયાય હર્મ્યેષુ તસ્થૌ યતઃ પ્રજજ્ઞ ઇન્દ્રો અસ્ય વેદ ॥

વયઃ સુપર્ણા ઉપ સેદુર્ ઇન્દ્રમ્ પ્રિયમેધા ઋષયો નાધમાનાઃ ।
અપ ધ્વાન્તમ્ ઊર્ણુહિ પૂર્ધિ ચક્ષુર્ મુમુગ્ધ્ય્ અ1સ્માન્ નિધયેવ બદ્ધાન્ ॥